भुटानको थिम्पुमा भएको खेलमा उत्तर कोरिया ११-० ले जित निकाल्दै समूह 'ए' विजेता बन्यो ।
काठमाडौँ — तीनपल्टको विश्व तथा दुईपल्टको एसियाली च्याम्पियन उत्तर कोरिया सन् २०२६ को यू-२० वुमेन्स एसियाकपका लागि छनोट भएको छ । लगातार तेस्रो जितका लागि उसले आइतबार नेपाललाई ११-० ले हराएको हो ।
भुटानको थिम्पुमा भएको खेलमा उत्तर कोरिया एकपक्षीय रुपमा हाबी रह्यो । यससँगै उसको ९ अंक भयो र समूह 'ए' विजेता बन्यो । उत्तर कोरियाले अब अर्को वर्ष थाइल्यान्डमा हुने यू-२० प्रतियोगिता खेल्नेछ ।
उत्तर कोरियाले यसअघि साउदी अरेबियालाई १५-० र भुटानलाई १०-० ले हराएको थियो । हारसँगै नेपाल तीन खेलबाट चार अंकमा सीमित रह्यो । आइतबारको अर्को खेलमा भुटान र साउदी अरेबिया भिड्दै छन् ।
यसको नतिजाले नेपाल समूहको कुन स्थानमा रहने हो, त्यो निर्णय गर्नेछ ।
