काठमाडौँ — तीन अंकमा खुसी । तर प्रदर्शनमा भने खुसी छैन नेपाल । यू–२० एएफसी एयिया कप छनोटमा शुक्रबार नेपालले साउदी अरेबियामाथि हात पारेको जित यस्तै रह्यो ।

 दोस्रो हाफको इन्ज्युरी समय सुरु हुनै लाग्दासम्म गोलरहित बराबरी निश्चित देखिएको थियो । तर, यही बेला वैकल्पिक खेलाडीका रूपमा मैदान छिरेकी सुक्रिया मियाँले गोल गरिन् । नेपालको पक्षमा आयो, १–० को जित । 

प्रशिक्षक यामप्रसाद गुरुङले खेलपछि भने, ‘तीन अंकमा खुसी छौं ।’ कारण स्पष्ट छ, यो जितले थाइल्यान्डमा हुने यू–२० एसिया कपमा छनोट हुने सम्भावना कायम राख्यो । छनोटमा कुल ८ समूह छ । त्यसमध्ये प्रत्येक समूहका विजेता स्वतः छनोट हुनेछ । दोस्रो स्थानमा रहने ८ टिममध्ये उत्कृष्ट तीन टिम पनि प्रतियोगितालाई छनोट हुने प्रावधान छ । नेपालको यही सम्भावना कायम रहेको हो । 

यो जितपछि नेपालको २ खेलबाट ४ अंक भएको छ । अब नेपालको तेस्रो तथा अन्तिम खेल शक्तिशाली उत्तर कोरियाविरुद्ध रहेको छ । यो टिम यू–२० उमेर समूहमा तीनपल्टका विश्वकप र दुईपल्टको एसिया कप च्याम्पियन हो । उसले शुक्रबारकै दोस्रो खेलमा भुटानलाई अपेक्षित एकपक्षीय ढंगमा सजिलै १०–० ले हरायो । त्यस अगाडि कोरियाली टिमले साउदी अरेबियालाई पनि १५–० ले पराजित गरेको थियो । 

यस्तोमा भुटान एक अंकमा सीमित रह्यो भने साउदी अरेबिया अहिलेसम्म अंकको खाता खोल्न असफल छ । यस स्थितिमा साउदी अरेबियाको छनोट सम्भावना समाप्त भएको छ भने भुटानको कायम छ । साउदी अरेबियाविरुद्ध नेपालको प्रदर्शन कुनै पनि अर्थमा उत्साहबर्द्धक रहेन । त्यसैले तिनै प्रशिक्षक गुरुङको भनाइ थियो, ‘प्रदर्शनमा खुसी छैन ।’