नेपाली टिमका प्रशिक्षक याम गुरुङले एएफसी यू–२० छनोटमा समर्थकको मन दुखाउने काम नहुने बताए। समूहको जित नेपालको मुख्य उद्देश्य हो।
काठमाडौँ — नेपालले एएफसी वुमेन्स एसिया कप छनोट यू–२० मा बुधबार भुटानको सामना गर्दैछ । भुटानको थिम्पुमा हुन लागेको छनोटमा नेपाल समूह ‘ए’ मा छ । छनोटमा कुल चार टिम छन् । बुधबार नै हुने पहिलो खेलमा बलियो उत्तर कोरियाले साउदी अरेबियाको सामना गर्नेछ ।
प्रतियोगिताको पूर्व सन्ध्यामा आयोजित प्रि–म्याच कन्फ्रेन्समा नेपाली टिमका मुख्य प्रशिक्षक याम गुरुङले नेपाली फुटबल समर्थकलाई मन दुखाउने काम नहुने बताएका छन् । उनले भने, ‘नेपाली फुटबल समर्थक निकै संवेदनशील छन् । यसपल्ट हामी उनीहरूको मनमा चोट पुर्याउने छैनौँ ।’
उनले नेपालको उद्देश्य एएफसी वुमेन्स एसिया कप यू–२० मा छनोट नै रहेको बताए । छनोटमा कुल आठ समूह रहेका छन् । प्रत्येक समूहको विजेता एसिया कपका लागि छनोट हुनेछ । प्रत्येक समूहको दोस्रो स्थानमा रहने टिममध्ये उत्कृष्ट तीन टिम पनि छनोट हुनेछ ।
कप्तान बिर्सना चौधरीले पनि छनोट नै एक मात्र उद्देश्य रहेको बताइन् । उनले भनिन्, ‘कुनै पनि टिमलाई कमजोर मानेका छैनौँ । हामीले खेल आफ्नो पक्षमा पार्नका लागि सक्दो मिहिनेत गरेर खेल्नेछौँ । हाम्रो उद्देश्य त समूह जित्ने नै रहेको छ ।’
