काठमाडौँ — घरेलु भूमिमा बंगलादेशले साफ यू–२० वुमेन्स च्याम्पियनसिपको उपाधि जितेको छ । अब भन्न करै लाग्छ, उपाधिका लागि यो टिम पूर्ण हकदार छ । ढाकास्थित बसुन्धारा किंग्स एरिनामा सोमबार भएको खेल निर्णायक थियो, त्यसैले त्यो अघोषित फाइनल रह्यो ।

यसमै बंगलादेशले सानदार प्रदर्शन गर्दै नेपाललाई ४–० ले पराजित गर्‍यो । अझ यसलाई ‘सागोरिका ४–० नेपाल’ भन्दा पनि हुनेछ । 

प्रतियोगिता धेरै अर्थमा नेपालका लागि निराशाजनक रह्यो । किनभने बंगलादेशविरुद्धको दुवै खेलमा नेपाली टोली पराजित रह्यो । डबल राउन्ड रोबिनका आधारमा भएको प्रतियोगितामा नेपाल बंगलादेशसँग पहिलो खेलमा ३–२ ले पराजित भएको थियो । नेपालका लागि खुसीको उपलब्धि के रह्यो भने भविष्यलाई केही यस्ता खेलाडी तयार भएका छन्, जसले नेपाली महिला राष्ट्रिय टिमको स्थान लिन सक्नेछ । 

पूर्णिमा राई प्रतियोगिताकै सर्वाधिक गोलकर्ता रहिन् । उनले १० गोल गरिन् । उपाधि जित्नका लागि नेपाललाई प्रतियोगिताको अन्तिम खेल तथा अघोषित फाइनलमा बंगलादेशमाथि निश्चित जित आवश्यक थियो । तर बंगलादेशले यस्तो कुनै अवसर नै छाडेन । धेरै अर्थमा टोली व्यावसासिक खेल प्रदर्शन गर्न सफल रह्यो । बंगलादेशको प्रभावशाली जितमा सागोरिका नायिका रहिन् । उनले ह्याट्रिकसहित चार गोल गरिन् । 

उनी तीन खेलको प्रतिबन्धपछि टिममा फर्केकी थिइन् । उनले आफ्नो उपयोगिता साबित गरिन् । बंगलादेशी राष्ट्रिय टिमकी सदस्य रहेकी सागोरिकाले खेलको ८, ५१, ५८ र ७७ औं मिनेटमा गोल गरिन् । प्रतियोगितामा उनको यो दोस्रो ह्याट्रिक रह्यो । उनी नै प्रतियोगिताको उत्कृष्ट खेलाडीसमेत घोषित भइन् । यो नतिजापछि बंगलादेश सबै ६ खेलमा विजयी रह्यो । १८ अंक बटुलेर शीर्षस्थानमा रहँदै च्याम्पियन बन्न सफल भयो । 

नेपालविरुद्ध सागोरिकाले गोल गरेपछि खुसी साट्दै बंगलादेशी खेलाडी ।  तस्बिर : साफ 

नेपाल भने १२ अंकमा सीमित रहेर दोस्रो स्थानमा रह्यो । भुटान र श्रीलंकामाथि भने नेपाल सजिलै विजयी रहेको थियो । प्रतियोगितामा भुटानको ६ अंक हुँदा श्रीलंका अंकविहीन बन्यो । 

भुटानले दिनको पहिलो खेलमा श्रीलंकालाई ५–० ले हराएको थियो । भुटानले प्राप्त गरेको दुवै जित श्रीलंकाविरुद्ध थियो । यता बंगलादेश भने दक्षिण एसियाली महिला फुटबलको यो उमेर समूहको प्रतियोगितामा पाँचौंपल्ट विजेता बन्न सफल भयो ।