फिलाडेल्फिया — चेल्सीले मंगलबार ट्युनिसियाको इस्पेरेन्सलाई ३–० ले हराएर फिफा क्लब विश्वकपको समूह ‘डी’ बाट नकआउट चरणको यात्रा गरेको छ ।

चेल्सीले अब अन्तिम १६ मा बेन्फिकाको सामना गर्नेछ । पोर्चुगलको बेन्फिकाले भने बायर्न म्युनिखलाई १–० ले पराजित गर्दै यो चरणको यात्रा निश्चित गरेको हो । यो जितसँगै बेन्फिकाले समूह ‘सी’ पनि जितेको छ । 

टोलीको ३ खेलबाट ७ अंक भएको छ । बायर्न भने ६ अंकसहित दोस्रो स्थानमा रह्यो । बेन्फिकाको हातबाट प्रतिस्पर्धात्मक खेलमा बायर्न पराजित भएको यो नै पहिलो पटक हो । यो खेलअघि नै बायर्न नकआउट चरण प्रवेश निश्चित भइसकेको थियो । त्यसैले प्रशिक्षक भिन्सेन्ट कोम्पनीले खेलमा आफ्नो दोस्रो रोजाइका खेलाडी उतारेका थिए । खेलको निर्णायक गोल भने आन्द्रेस सेजेडेरुपको नाममा रह्यो । 

यही समूहको अर्को खेलमा अकल्यान्ड सिटीले बोका जुनियर्सलाई १–१ को बराबरीमा रोक्यो । यो नतिजासँगै बोका जुनियर्स प्रतियोगिताबाट बाहिरिएको छ । बेन्फिकाका प्रशिक्षक ब्रुनो लागे भने आफ्नो टिमको प्रदर्शनमा स्वाभाविक रूपमा खुसी रहे । उनले भने, ‘यो जितलाई क्लब इतिहासमै ऐतिहासिक भन्दा हुन्छ । हामी विजयी रह्यौं, किनभने हाम्रो रणनीति सफल रह्यो ।’