काठमाडौँ — एक प्रकारले प्रशिक्षक प्याट्रिक डे वाइल्ड भाग्यमानी रहे । उनी भर्खर नेपाली राष्ट्रिय महिला टोलीका मुख्य प्रशिक्षक नियुक्त भएका छन् । अब उनकै नेतृत्वमा नेपालले महिलाको एक सय अन्तर्राष्ट्रिय खेल खेल्नेछ । एसिया कप छनोटको समूह ‘एफ’ मा लाओसविरुद्धको खेल नेपालको कोसेढुंगाको रूपमा सय खेल हुनेछ । यो नै एक कारण नेपाली खेलाडीलाई उत्साही बनाउन पुग्नेछ । यत्तिमा त उनी पनि सहमत हुनेछन् । मुख्य प्रशिक्षक नियुक्त भएयता उनको भनाइ रह्यो, ‘आशावादी र सकारात्मक रहौं ।’

नेपाल सुपर लिग (एनएसएल) मा काठमाडौं रेजर्सका लागि प्रशिक्षक रहेका ६१ वर्षीय डे वाइल्ड प्राविधिक रूपमा उच्च र अनुभवमा खारिएको मानिन्छ । अब उनले शनिबार नै टिमको पहिलो अभ्यास सत्र राखेका छन् र सबै स्थिति बुझ्न प्रयास गर्नेछन् । त्यसअघि उनले नेपाली राष्ट्रिय टिमले खेलेका मुख्य खेलहरू भने हेरिसकेका छन् र एक खाले सोच बनाएका छन् । यो सोचले भन्छ, ‘हामीलाई जित्नु नै छ ।’ 

अखिल नेपाल फुटबल संघ (एन्फा) ले उनीसँग एक वर्षको अनुबन्ध गरेको छ । डे वाइल्डले भने, ‘म चुनौती स्वीकारेर नै नेपाल आएको छु । एनएसएलका लागि नेपाल छँदा मैले यहाँको फुटबल महासुस गरेको हो । एक प्रकारको सम्बन्ध बनेको छ । त्यसैले मलाई अहिलेको नयाँ चुनौतीसम्म डोहोर्‍याएको छ ।’ 

तीन सातापछि नै उज्वेकिस्तानमा एसिया कप सुरु हुनेछ । त्यसमा आयोजक उज्वेकिस्तानसहित लाओस र श्रीलंका छन् । यो समूहबाट एकै टिममात्र एसिया कपमा प्रवेश गर्नेछ, दोस्रो हुने टिमसामु केही पनि हात पर्ने छैन । यस्तोमा नेपालको एकमात्र लक्ष्य समूह जित्ने नै हुनेछ । सम्भवतः नेपालका लागि लाओस र श्रीलंका ठूलो चुनौती हुने छैन । चुनौती भनेकै उज्वेकिस्तान हुनेछ । यो नेपालका लागि उच्च प्रतिद्वन्द्वी हो । के नेपाली महिला टोली उज्वेकिस्तानलाई पराजित गर्न सक्षम छ त ? ‘आशावादी रहौं । फुटबलमा सबै प्रकारको सम्भावना कायम हुन्छ,’ उनले भने, ‘यो ठूलो प्रतियोगिता हो र यसले पस्कने चुनौती पनि ठूलै हुने गर्छ । नेपाली राष्ट्रिय टिमको जिम्मेवारी सम्हालेको छु, यो पनि आफैमा ठूलो छ ।’

भलै, उनले एकै वर्षको मात्र अनुबन्ध गरेका छन् । उनको ध्यान भने अल्पकालीनभन्दा दीर्घकालीन योजनामा छ । उनी चाहन्छन्, धेरैभन्दा धेरै नेपाली महिला खेलाडीले विदेशमा खेलोस्, त्यसमा पनि युरोपमा । ‘माथिल्लो स्तरको लिगमा खेलेका खेलाडी टिमका लागि असाध्यै धेरै महत्त्वपूर्ण हुन्छ । धेरैभन्दा धेरै खेलाडीले विदेशमा खेल्नुपर्छ, मैले यसका लागि पनि प्रयास गर्नेछु ।’ उनी के मान्छन् भने नेपाली खेलाडी माथिल्लो स्तरको फुटबलका लागि तयार छन् अनि सक्षम पनि छन् ।