अहमदाबाद — विराट कोहली र रोयल च्यालेन्जर्स बेंगलुरुले पहिलो पटक इन्डियन प्रिमियर लिग (आईपीएल) को उपाधि जित्यो पन्जाब किंग्समाथि ६ रनको रोमाञ्चक जित हात पार्दै । साँच्चै कस्तो रह्यो त १८ औं संस्करणको आईपीएल ?

एएफपीले तयार पारेको प्रमुख विशेषता यस्ता छन् : 

अन्ततः कोहली च्याम्पियन

दुईपल्टको विश्वकप विजेता कोहलीको खेलजीवन आफैंमा उत्कृष्ट थियो । तर, त्यसमा एउटै कमी थियो आर्ईपीएल उपाधि । अब त्यो पनि पूरा भएको छ । उनी रोए, हाँसे, अनि पहिलो पटक आईपीएल उपाधि उचाले । लगातार १८ औं पटक प्रतियोगिता खेलेर कोहलीले यो सफलता पाएका हुन् । संयोग के भने उनको जर्सी नम्बर नै १८ छ । बेंगलुरुले पहिले ब्याटिङ गर्दै ९ विकेटमा बनाएको १ सय ९० रनमा कोहली ४३ रनसहित व्यक्तिगत उच्च रनकर्ता रहे । 

श्रेयसको कप्तानी प्रदर्शन

पन्जाबका लागि सबैभन्दा राम्रो खेल्ने खेलाडीमा रहे, कप्तान श्रेयस ऐर । टिमलाई दोस्रोपल्ट आईपीएलको फाइनल पुर्‍याउन उनले निर्णायक प्रदर्शन गरे । उनको ब्याटिङका लागि खेलाडी लिलामीमा पन्जाबले चर्को मूल्य तिरेको थियो । श्रेयसमाथि सबैभन्दा बढी विश्वास देखाउनेमा थिए प्रशिक्षक रिकी पोन्टिङ । श्रेयसले यसपल्ट ६ सय ४ रन बनाए । त्यसमा मुम्बई इन्डियन्सविरुद्ध इलिमिनेटर सनसनीपूर्ण अविजित ८७ रन थियो ।