तिलोत्तमा — रुपन्देहीमा जारी लीला सेन्चुरी मेमोरियल यू–१६ लुम्बिनी प्रदेशस्तरीय क्रिकेट प्रतियोगितामा बुधबार दाङले जित हात पारेको छ । उसले बाँकेलाई ६ विकेटले पराजित गरेको हो ।
सिद्धार्थ क्रिकेट मैदानमा भएको खेलमा टस जितेर ब्याटिङ गरेको बाँकेले निर्धारित ३५ ओभरमा सबै विकेट गुमाएर १ सय ४५ रन बनायो । उसका लागि भुवन शाहीले २९ र फर्दिन अली भाटले २२ रन बनाए ।
बलिङमा दाङका शुभम खनालले ३, करण जीएमले २ तथा दक्ष ठाकुर र सन्दीप थापाले समान १/१ विकेट लिए ।
जवाफी ब्याटिङ गरेको दाङले २२ ओभर ५ बलमा ४ विकेट गुमाएर १ सय ४७ रन बनाउँदै जित निकाल्यो । उसको जितमा शुभम खनालले अविजित ३३, मनोज केसीले नटआउट २७, अमिस सेन्चुरीले २७, योगेश्वर कुँवरले १६ र करण जीएमले १० रन बनाए ।
बलिङमा बाँकेका दिव्यान्स बर्माले ३ तथा निखिल धनकुट्टाले १ विकेट लिए ।
खेलमा दाङका शुभम खनाल प्लेयर अफ दी म्याच भएको खेल संयोजक प्रथम पराजुलीले जानकारी दिए । लिग चरणको १ खेल बाँकी रहँदै दाङ फाइनलमा प्रवेश गरेको छ । उसले शुक्रबार हुने फाइनलमा समूह ए को विजेता रुपन्देहीसँग प्रतिस्पर्धा गर्नेछ ।
