तिलोत्तमा — रुपन्देहीमा शुक्रबारदेखि लिला सेन्चुरी मेमोरियल लुम्बिनी प्रदेशस्तरीय यू–१६ छनोट क्रिकेट प्रतियोगिता सुरु भएको छ । खेलअन्तर्गत पहिलो खेलमा रुपन्देहीले पश्चिम नवलपरासीलाई २ सय ७१ रनको फराकिलो अन्तरले पराजित गरेको छ ।

टस जितेर पहिला ब्याटिङ गरेको रुपन्देहीले निर्धारित ३५ ओभरको खेलमा ३३.१ ओभरमा सम्पूर्ण विकेट गुमाएर ३ सय १६ रनको स्कोर खडा गरेको थियो । रुपन्देहीका लागि कप्तान समीर अली मुसलमानले शतकीय इनिङ खेल्दै १ सय १८ रन बनाएका थिए । त्यस्तै, सिद्धार्थ ढकालले ५५ रन, आरिफ खानले ४३ रन र रोजन कुमालले ३८ रनको उल्लेखनीय योगदान दिएका थिए ।

प्रतिउत्तरमा ३ सय १७ रनको लक्ष्यसहित ब्याटिङमा उत्रिएको नवलपरासीको टोली फितलो प्रदर्शन गर्दै केवल १६ ओभरमै ४५ रनमा सीमित हुन पुगेको थियो । नवलपरासीका प्रेम सागर यादवले १३ रन र आरोन जङ गिरीले १२ रनको योगदान दिएका थिए ।