काठमाडौँ — नेपाल यू–१९ साफ च्याम्पियनसिपमा मंगलबार भारतको हातबाट ४–० ले पराजित भएको छ र यससँगै प्रतियोगिताको समूह ‘बी’ को दोस्रो स्थानमा रहेर सेमिफाइनल खेल्ने भएको छ । अब नेपालले अन्तिम चारमा समूह ‘ए’ विजेता बंगलादेशको सामना गर्नेछ । यस्तै अर्को सेमिफाइनलमा भारत र माल्दिभ्स भिड्ने छन् ।

नेपाल र भारत यसअघि नै सेमिफाइनल पुगिसकेका थिए । लिग चरणका दुवै खेल जितपछि भारतको छ अंक भएको छ भने नेपाल तीन अंकमै सीमित रह्यो । भारत इटानगरको गोल्डेन जुबली स्टेडियममा भएको खेलमा भारतका लागि रोहिन सिंहले दुई गोल गरे । यस्तै ओमङ डोडुम र डानी मिथेईले १–१ गोल थपे ।

त्यस अगाडि समूह ‘ए’ को अन्तिम लिग खेलमा माल्दिभ्स र भुटानले २–२ को बराबरी खेले । भुटानलाई सेमिफाइनल पुग्न यो खेलमा निश्चित जित आवश्यक थियो, तर त्यसलाई आत्मसात् गर्न सकेन । यो नतिजापछि माल्दिभ्स दुई अंकमा रह्यो र अन्तिम चारमा पुग्न सफल रह्यो ।