बार्सिलोना — बार्सिलोनाले उत्कृष्ट पुनरागमन जित रच्दै आइतबार स्पेनी ला लिगामा रियल म्याड्रिडलाई ४–३ ले पराजित गरेको छ । ‘एल क्लासिको’ मा प्राप्त यस जितसँगै बार्सिलोना उपाधितर्फ उन्मुख भएको छ । अब उसलाई लिग उपाधि जित्न एक जित पर्याप्त रहनेछ ।

बार्सिलोनाको ३५ खेलबाट ८२ अंक भएको छ र शीर्षमा ६ । रियलबाट केलियन एमबापेले सानदार ह्याट्रिक गरे पनि त्यो आफ्नो टिमलाई हारबाट जोगाउन पर्याप्त रहेन । रियल ७५ अंकमा दोस्रोमा छ । दुई टिमबीचको दूरी सात अंक रहेको छ । स्टाडियो ओलम्पिकोमा भएको खेलमा रियलले १४ मिनेटभित्र दुई गोलको अग्रता लिएको थियो र एमबापेले पाँचौं मिनेटमा पेनाल्टीबाट पहिलो गोल गरेपछि १४ औं मिनेटमा दोस्रो थपे ।

त्यसपछि खेलमा बार्सिलोना छाएको थियो । एरिक गार्सियाले १९ औं मिनेटमा पहिलो गोल फर्काए भने लामिन यामलले ३२ औं मिनेटमा गोल गरेपछि खेल २–२ को बराबरीमा पुगेको थियो । राफिन्हाले ३४ औं मिनेटमा गोल गर्दै बार्सिलोनालाई पहिलोपल्ट अगाडि राखे । उनैले ४५ औं मिनेटमा आफ्नो दोस्रो व्यक्तिगत गोल पनि थपे । एमबापेले ७० औं मिनेटमा ह्याट्रिक पूरा गरे ।