पुरुषतर्फ नेपाल पुलिस क्लबले दोस्रो जित निकालेको छ । समूह ‘बी’ को खेलमा पुलिसले एपीएफमाथि ३–० गोलको जित निकाल्यो । पुलिसका नवराज खत्रीले ह्याट्रिक गरे ।

चार टोली रहेको समूहबाट शीर्ष दुईमा रहँदै पुलिसले सेमिफाइनलमा स्थान बनाएको छ । समान दुई खेलबाट अपराजित पुलिसको ६ अंक र कर्णालीको ३ अंक छ । दुई खेलबाट एपीएफ र बागमतीको समान १ अंक छ । यो समूहमा कर्णालीसँगै एपीएफ र बागमती तीनै टोलीको शीर्ष दुईभित्र रहेर सेमिफाइनलमा पुग्ने सम्भावना कायमै छ ।

अर्को खेलमा कोशी र गण्डकीले ३–३ गोलको बराबरी खेले । कोशीका लक्ष्मण सामरिया, योगेशकुमार बाह्रघरे र आर्यन चौधरीले १–१ गोल गरे । गण्डकीबाट दीपक तामाङले २ र संगम घर्तीमगरले १ गोल गरे । दुवै टोली जित निकाल्दै सेमिफाइनलको सम्भावना बलियो बनाउन चाहन्थे । तर, बराबरीपछि आर्मीले सेमिफाइनलमा स्थान बनायो । २ खेलबाट आर्मी ६ अंकसहित शीर्षस्थानमा छ । २  खेलमा कोशीको ४ अंक, गण्डकीको १ अंक छ भने मधेश अंकविहीन छ । कोशी र गण्डकीमध्ये एक टोलीको सेमिफाइनलमा स्थान बनाउने छ ।