सुनसरी — नेपाल पुलिस क्लबले तेस्रो एमएम कप एकदिवसीय राष्ट्रिय क्रिकेट प्रतियोगिताको उपाधि जितेको छ । पुलिसले त्रिभुवन आर्मी क्लबको ह्याटिक उपाधि यात्रालाई रोक्दै पहिलो पटक एमएम कप जितेको हो ।

विराटनगरको बैजनाथपुरस्थित गिरिजाप्रसाद कोइराला क्रिकेट मैदानमा सम्पन्न शनिबार फाइनलमा पुलिसले दुई संस्करण विजेता आर्मीलाई २४ रनले हरायो । दुवै पटक पुलिसलाई हराएर आर्मी विजेता बनेको थियो । यस पटक पुलिसले आर्मीसँग बदला लिएको छ ।

२ सय ४० रनको लक्ष्य पछ्याएको आर्मीले ४८ ओभरमा सबै विकेट गुमाई २ सय १५ रन बनाउन सक्यो । हिमांशु दत्ताले अर्धशतकीय योगदान गरे । उनले ८० बलमा ६ चौका र २ छक्का प्रहार गरे । निश्चल क्षेत्रीले ३६, इमरान शेखले २४ र नरेन साउदले २१ रन बनाए । विशाल सुस्लिङले १८ रन बनाउँदा कप्तान विनोद भण्डारीले ७ रन बटुले । उत्कृष्ट सुरुआत गरेको आर्मीले १ सय ३० रन बनाउँदा मात्र १ विकेट गुमाएको थियो । तर २७ औं ओभरमा हिमांशु दत्तालाई विपिन खत्रीले क्याचआउट गरेपछि आर्मीको विकेट खस्नेक्रम रोकिएन र पुलिस खेलमा फर्कियो । गृहनगरमा खेलिरहेका पुलिसका श्रवण यादवले विनोद भण्डारी, नरेन साउद, तुलबहादुर थापा र सुमित श्रेष्ठको गरी महत्वपूर्ण ४ विकेट लिए । उनले १० ओभरमा ६३ रन खर्चिए । चित्र विष्टले २, विपिन खत्री र सुनिल दौल्यालले १–१ विकेट लिए ।