काठमाडौँ — सातदोबाटोस्थित सहिद स्मारक ‘बी’ डिभिजन लिग फुटबल चलिरहेको छ । त्यसैको प्रतिस्पर्धी टोली सरस्वती युवा क्लबले आफ्ना एक खेलाडीमाथि फुटबलको सर्वोच्च निकाय एन्फाले अन्याय गरेको आरोप लगाएको छ ।

सरस्वतीले अखिल नेपाल फुटबल संघ (एन्फा) ले आफ्ना स्ट्राइकर धिरेन्द्रबहादुर शाहलाई बदनियतपूर्वक कारबाही गरिएको जनाएको छ । सरस्वतीले सुरुमा बाँसबारीविरुद्ध २–१ र नयाँबस्तीविरुद्ध १–० ले जित पाएको थियो । दुवै खेलमा धिरेन्द्रले गोल गरेका थिए ।

नयाँबस्तीले दायर गरेको प्रोटेस्टमा एन्फाले कारबाही गर्दै धिरेन्द्रलाई निलम्बन गरेको छ । उनलाई एन्फाले निलम्बन गर्नुको कारण पूर्वक्लब श्री टुसाल युथसँगको सम्झौतालाई आधार मानेको छ । २२ वर्षीय खेलाडी धिरेन्द्रलाई निलम्बन मात्र गरिएन, सरस्वतीको पक्षबाट १–० को नतिजा उल्टाएर नयाँबस्तीलाई ३–० ले जिताइएको छ ।

सरस्वती युवा क्लबका अध्यक्ष उत्तमराज भण्डारीले उक्त निर्णयको कडा आलोचना गर्दै एउटा प्रतिभावान खेलाडीको भविष्यमाथि खेलवाड गरिएको बताएका छन् ।

‘एन्फाले तथ्यमा टेकेर छानबिन नगरी यो निर्णय गरिएको हो । यो एक होनहार खेलाडीको करियरमाथि गम्भीर धक्का हो । यो राजनीतिक रूपमा प्रेरित छ,’ अध्यक्ष भण्डारीले सोमबार पत्रकार सम्मेलनमा भने ।

पत्रकार सम्मेलनमा उपलब्ध गराइएको कागजातअनुसार धिरेन्द्रको टुसालसँगको सम्झौता २०७८ चैत १२ सम्म थियो । त्यो वर्ष लिग नै भएन । सम्झौता बढीमा २०८० को चैतसम्म थियो । सम्झौतामा उल्लेख गरिएको पहिलो किस्तावापत्को २० प्रतिशत रकम पनि टुसालले खेलाडीलाई नदिइएको हुँदा सम्झौता स्वतः बदर भएको सरस्वतीको दाबी छ । धिरेन्द्रले जारी सिजनअगावै सरस्वतीसँग नयाँ सम्झौता गरेका थिए ।