काठमाडौँ — भन्ने गरिन्छ, फुटबलका प्रतियोगिता कहिलेकाहीं आफैं कथाकार हुने गर्छ । तिनले मीठो कथा रच्ने गर्छ । नेपाल सुपर लिग (एनएसएल) यदि आफैंमा कथाकार हो भने उसले रचेको एउटा सुन्दर कथा हो, पहिलो क्वालिफायरमा ललितपुर सिटी एफसीविरुद्ध धनगढी एफसीको भेट । के यो फाइनलअघिको फाइनल हो त ?

यसका लागि केही दिन कुनुपर्छ । तर एउटा तथ्य निश्चित छ, यसपल्ट प्रतियोगिताले पस्कन सक्ने सबैभन्दा ठूलो खेल भनेकै यही हो ।

त्यसैले मज्जाले भन्न सकिन्छ, यो ‘ब्लकबस्टर’ खेल हुनेछ । त्यसो त एनएसएलले भर्खर तेस्रो सिजन छोएको छ, यसबीच तीन टिम आफैंमा ठूलो भएर अगाडि आएका छन् । त्यसमध्ये दुई त ललितपुर र धनगढी नै भए । अर्को काठमाडौं रेजर्स । यसपल्ट प्लेअफमै पुग्न नसकेपछि यो अब ठूलो टिम रहेन । यस्तोमा एनएसएलमा ठूला दुई टिम भन्नु नै ललितपुर र धनगढी रहे । यस्तोमा यी दुईलाई मज्जाले यस्तो भन्न सकिन्छ, ‘बिग टु’ ।

फेरि जब यी दुई टिम दशरथ रंगशालामा उत्रन्छन्, माहोल दमदार बन्छ । यिनै दुई टिम हुन् सक्दो प्रशंसक र समर्थक उतार्न सक्ने । यिनको भिडन्त शनिबार काठमाडौंमा हुँदै छ । नेपाली घरेलु फुटबललाई माया लाग्छ भने यो सबैले पक्कै हेर्नुपर्ने खेल हुनेछ ।

ललितपुरका प्रशिक्षक हुन्, साइमन ग्रेसन । खेलाडी छँदा उनले लिड्स युनाइटेड, लेस्टर सिटी, एस्टन भिल्लादेखि ब्लाकबर्नसम्म खेले । प्रशिक्षकका रूपमा ब्ल्याकपुल, लिड्स, सन्डरल्यान्ड र ब्राएडफोर्ड सिटीदेखि बेंगलुरु एफसीसम्म सम्हालिसकेका छन् । उनी भन्छन्, ‘धनगढी असाध्यै बलियो टिम हो ।’

धनगढीका प्रशिक्षक हुन्, हुँवा म्यानुएल मार्टिनेज । उनको खेलाडी जीवनबारे धेरै तथ्य छैन । प्रशिक्षकका रूपमा उनीसँग पनि एसिया, अमेरिका र अफ्रिकामा खेलाएको अनुभव छ । मिडियासामु प्रस्तुत हुँदा प्रत्येकपल्ट ‘ह्वाउ’ भन्ने बानी छ उनको । उनी भन्छन्, ‘ललितपुर असाध्यै राम्रो टिम हो ।’ सार के भन्दा दुवै प्रशिक्षक आ–आफ्नो प्रतिद्वन्द्वीको प्रशंसा गर्न कन्ज्युस्याइँ पनि गर्दैनन् ।

अपराजित ललितपुर सिटी

लिग चरणमा ललितपुर अपराजित रह्यो । ६ खेलमा तीन विजयी रह्यो, तीनमा बराबरी । यसरी १२ अंक बटुलेर ललितपुर शीर्षस्थानमा रह्यो । एनएसएलको तीन सिजनको इतिहासमा ललितपुर अहिलेसम्मकै उत्कृष्ट लयमा छ । ललितपुर पछिल्ला ९ खेलमा अपराजित छ र यो कीर्तिमान हो । यसमध्ये तीन खेल त गत सिजनको हो, त्यसमा दुई प्लेअफ हो भने एक फाइनल । यी तीन खेल लगातार जितेर त हो, ललितपुर दोस्रो सिजन च्याम्पियन बनेको ।

यही लयलाई ललितपुरले यसपल्ट कायम राखेको छ भन्दा हुन्छ । यो अर्थमा सम्भवतः धनगढीले एक प्रकारले ‘मोमेन्टम’ गुमाएको छ । भयो के भन्दा चितवनविरुद्धको अन्तिम खेलमा टोलीलाई जित र हार दुवैको खासै अर्थ थिएन । त्यसैले टिमले दोस्रो रोजाइका खेलाडी उतारेको थियो । यहींनिर टिमले माथ खाएको छ भन्दा हुन्छ । तर यो ‘आँधीहुरी आउनु अघिको सन्नाटा’ जस्तै पनि हुनसक्छ । धनगढीले जानेर बुझेर नै यस्तो रणनीति बनाएको पनि हुनसक्छ ।

धनगढीलाई लागेको हुनसक्छ, मुख्य खेलअगाडि आफ्ना प्रमुख खेलाडीलाई आराम दिएकै राम्रो । धनगढी ११ अंकसहित दोस्रोमा रह्यो । चितवनविरुद्ध यो प्रतियोगिताकै सबैभन्दा ठूला स्टार अहमद हिजाजीले खेलेनन् । उनी खेल हुँदा दर्शकदीर्घातिर थिए । पहिलो क्वालिफायरमा सबैको नजर हुने एकमात्र खेलाडी यिनै हुन् । यो सिजन उनले ६ गोल गरिसके । गत सिजन ४ गोल गरेका थिए । यस्तोमा उनी यो प्रतियोगितामै सर्वाधिक गोल गर्ने खेलाडी पनि हुन्, साँच्चै उनी छिटो र छरितो छन् ।

एकाएक मौका सिर्जना गर्न माहिर छन्, कसैले केही छनक नपाएकै बेला पनि । अझ नेपालको घरेलु फुटबलमा खेल्न सबैभन्दा राम्रा विदेशी खेलाडीमध्ये एक भन्दा हुन्छ । खेलपछिका अधिकांस ‘पोस्टम्याच कन्फ्रेन्स’ कोही एक खेलाडीका धेरै बढी चर्चा हुने गरेको छ भने त्यो यिनै हिजाजी हुन् । प्रभाव त ब्राजिली खेलाडी सर्जियो बारबोजुले पनि छाडेका छन् ।

नेपाली खेलाडीको नाम लिने हो भने कृतिशरत्न छुन्जुलाई कसरी छुटाउन सकिन्छ र ? उनी अहिले आफ्ना साथीहरूभन्दा एक तह माथि देखिएका छन् । धनगढीलाई शान्त राख्ने हो भने ललितपुरले सबैभन्दा पहिले हिजाजीलाई रोक्न सक्नुपर्छ । अनि बारबोजु र छुन्जुलाई पनि त्यसै छोड्न मिल्ने छैन । ललितपुरको टिममा एउटै यस्तो नाम लिन सकिन्न, धेरै हदसम्म । तर एउटा टिमको रूपमा ललितपुर उत्कृष्ट छ । टोलीका लागि नेपालकै नाम चलेका खेलाडी महत्त्वपूर्ण साबित भइरहेका छन्, जस्तो कप्तान अनन्त तामाङ, योगेश गुरुङ, सनिश श्रेष्ठ र मणिकुमार लामा ।

प्लेअफमा नहार्ने धनगढी

धनगढीको एउटा बलियो पक्ष के हो भने यो टिमले लगातार तेस्रोपल्ट क्वालिफायर–वान खेल्दै छ । यसअघिका दुवै पहिलो क्वालिफायनरमा यही टिम विजयी थियो । यस्तोमा यो टिम प्लेअफमा हार्ने गर्दैन । इतिहासले यस्तै भन्छ । पहिलो सिजन टोलीले काठमाडौंलाई हराएको थियो भने दोस्रो सिजन पोखरालाई । संयोगले प्लेअफमा ललितपुर र धनगढीबीच भेट भएको छैन । लतिलपुरले भने प्लेअफमा चारपल्ट खेलेको छ, त्यसमध्ये तीन खेलमा विजयी छ ।