कोशी दुहबी क्यापिटललाई ५६ रनले पराजित गर्दे छिन्नमस्ता रुपनी मधेश राइडर्स विजयी
राजविराज — कोसी दुहबी क्यापिटललाई ५६ रनले पराजित गर्दे छिन्नमस्ता रुपनी मधेश राइडर्स 'मधेश प्रिमियर लिग क्रिकेट प्रतियोगिता तेस्रो संस्करण'को उद्घाटन खेलमा विजयी भएको छ । शंकर राणाको ६५ रनको मद्दतमा छिन्नमस्ताले जित हात पारेको हो ।
समयका कारण १८ ओभरमा छोट्याइएको खेलमा निर्धारित ओभरमा ६ विकेट गुमाउँदै छिन्नमस्ताले १ सय ५४ रनको स्कोर खडा गरेको थियो । छिन्नमस्ता रुपनीको १ सय ५४ रनको योगफलमा शंकर राणाले सर्वाधिक ६५ का अतिरिक्त सन्तोष कार्कीले ३१ र रोहन विकले २२ रनको योगदान गरे । बलिङतर्फ कोशी दुहबीका कृष्ण कार्की र आकाश त्रिपाठीले ३/३ विकेट लिएका थिए ।
कोशी दुहबीले १३ ओभर ४ बलमा सबै विकेट गुमाई ९८ रन मात्र बनायो । कोसी दुहबीका लागि इशान पाण्डेले ३७, सोनु अन्सारी २९ र दीपेश कँडेलले १६ रन बनाए । बलिङतर्फ छिन्मस्ताका नारायण जोशी, दिनेश अधिकारीले ३/३ विकेट, अभिषेक कार्कीले २ विकेट, दिवान पुनले १ विकेट लिए । प्लेअर अफ द म्याच शंकर राणा घोषित भए ।
प्रतियोगिताको मधेश प्रदेशका मुख्यमन्त्री सतिशकुमार सिंहले ब्याटिंग र मधेश प्रिमियर लिगका अध्यक्ष इन्जिनियर सञ्जीवनारायण यादवले बलिङ गर्दै उद्घाटन गरे । बुधबार पहिलो खेल सप्तरी बलान बिहुल सुपर किङ र छिन्मस्ता रूपनी मधेश राइडर्स तथा दोस्रो खेल कोशी दुहबी र काठमाडौं रोयल्सबीच हुने आयोजकले जनाएको छ ।
कुल ६ टिमको सहभागिता रहेको प्रतियोगितामा राष्ट्रिय तथा अन्तरराष्ट्रिय खेलाडी सहभागी हुनेछन् । दीपेन्द्रसिंह ऐरी, कुशल भुर्तेल, आरिफ शेख, आशिफ शेख, गुलसन झा, ललित राजवंशी, वसिर अहमद, रसिद खान, विवेक यादव, नन्दन यादव, अर्जुन साउद र अमित श्रेष्ठ लगायतका खेलाडी मैदानमा ओर्लनेछन् । प्रतियोगितामा कुल १८ वटा खेल हुनेछ ।
प्रथम टिमलाई नगद ९ लाख १ हजार, दोस्रोलाई ४ लाख १ हजार र म्यान अफ द सिरिजलाई १ लाख ५१ हजार पुरस्कारको व्यवस्था गरिएको अध्यक्ष यादवले बताए । प्रतियोगितामा कुल एक करोड १७ लाख ५ सय रुपैयाँ खर्च हुने अनुमान छ । प्रतियोगिताको फाइनल खेल वैशाख ११ मा हुनेछ ।
