राउन्ड रोबिनका आधारमा हुने प्रतियोगिता विजेता २०२६ मा हुने आईसीसी यू–१९ विश्वकपका लागि छानिने
काठमाडौँ — नेपालले आइतबार आईसीसी यू–१९ विश्वकप एसिया छनोट प्रतियोगितामा यूएईसँग आफ्नो पहिलो खेल खेल्दै छ । यो खेल मूलपानीको तल्लो क्रिकेट मैदानमा हुनेछ । यस मैदानमा पहिलो पटक अन्तर्राष्ट्रिय क्रिकेट खेल हुन लागेको हो ।
अप्रिल १९ सम्म मूलपानीमा हुने प्रतियोगितामा नेपाल र यूएईसहित अफगानिस्तान, हङकङ र ओमानले प्रतिस्पर्धा गर्नेछन् ।
प्रतियोगिताका सवै खेल मूलपानीको माथिल्लो र तल्लो क्रिकेट मैदानमा हुनेछ । राउन्ड रोबिनका आधारमा हुने प्रतियोगिता विजेता २०२६ मा जिम्बावे र नामिबियामा हुने आईसीसी यू–१९ विश्वकपका लागि छनोट हुनेछ । नेपालले अफगानिस्तान यू–१९ सँग तीन युथ एकदिवसीय खेल खेलेर प्रतियोगिताको तयारी गरेको थियो । त्यसमा नेपाल २–१ ले पराजित भएको थियो ।
५ दिनअघि नै नेपाल आइपुगेको यूएई यू–१९ टिमले एक अभ्यास खेल खेल्नेक्रममा नेपाल यू–१९ को वैकल्पिक टोलीलाई पराजित गरेको छ । नेपाली टिम दुई वर्षअघि यूएईलाई निर्णायक खेलमा पराजित गरी यू–१९ विश्वकपमा पुगेको थियो ।
यूएईपछि नेपालले सोमबार ओमानसँग, बुधबार हङकङसँग र शनिबार अफगानिस्तानसँग खेल्नेछ । राउन्ड रोबिन लिगमा सर्वाधिक अंक ल्याउने टोली विजेता बन्दै यू–१९ विश्वकपमा पुग्नेछ । नेपालले गत वर्ष दक्षिण अफ्रिकामा भएको यू–१९ विश्वकपमा अफगानिस्तानलाई पराजित गर्दै सुपर सिक्समा प्रवेश गरेको थियो । समूह चरणबाटै बाहिरिएपछि टेस्ट मान्यताप्राप्त अफगानिस्तान अहिले एसिया छनोट खेल्न आएको हो ।
नेपालले यू–१९ विश्वकप छनोट तेस्रो पटक आयोजना गर्न लागेको हो । यसअघि सन् २००१ र २००५ मा गरी घरेलु मैदानमा दुई पटक आयोजना भएको एसीसी यू–१९ कप जित्दै नेपाल यू–१९ विश्वकपमा पुगेको थियो । नेपालले आठ पटक यू–१९ विश्वकप खेलिसकेको छ ।
