सल्यान — जिल्लाको कालिमाटी गाउँपालिका ७ घुईंयाबारीमा नयाँ वर्षको अवसर पारेर खुला फुटवल प्रतियोगिता सुरु भएको छ । कालिमाटी गाउँपालिका वडा नं ७ को आयोजनामा खुला फुटवल प्रतियोगिता मंगलबार सुरु भएको हो ।
प्रतियोगितामा वडाका विभिन्न युवा क्लवका ८ टिमले भाग लिएको छ । खेलतर्फ युवालाई उत्साहित गर्न मात्र नभई खेल स्वास्थ्यका लागि पनि लाभदायक भएकाले वडाले फुटवल खेलको आयोजना गरेको वडा अध्यक्ष मित्रलाल रिजालले बताए ।
खेल मैदान नभए पनि बाँझो रहेका खेतीयोग्य जग्गालाई सम्याएर फुटबल खेलाउँदै आएको वडा अध्यक्ष रिजालले जानकारी गराए । युवापुस्ता सबै वैदेशिक रोजगारीमा गएकाले गाउँघर सुनसान बन्दै गएका बेला चहपहल होस र छुटिएका साथीको भेटघाट होस् भनेर बेलाबेलामा विभिन्न खेलकुद प्रतियोगिता आयोजना गर्दै आएको उनको भनाइ छ ।
