दाङ — लुम्बिनी प्रदेशस्तरीय टी-२० क्रिकेट प्रतियोगिता सोमबारदेखि लमही र घोराहीमा सुरू भएको छ । लुम्बिनी प्रदेश खेलकुद परिषद्‌को आयोजना तथा दाङ जिल्ला क्रिकेट संघको व्यवस्थापनमा सुरु भएको प्रतियोगितामा दाङ रोल्पालाई १० विकेटको प्रभावशाली जित हासिल गर्दै सेमिफाइनल प्रवेश गरेको छ ।

घोराही–१७ गुलरियास्थित घोराही क्रिकेट रंगशालामा रोल्पाले दिएको २६ रनको सामान्य लक्ष्य दाङले ४ दशमलव २ ओभरमा बिना विकेटको क्षतिमा २७ रन बनाउँदै सेमिफाइनलमा पुगेको छ ।

दाङका लागि कप्तान सुशान्तसिंह थापाले १३ बलमा ३ चौकासहित १३ रन र आकाश पाण्डेले १३ बलमा ३ चौकासहित १४ रन जोड्दै सहज जित दिलाए ।

यसअघि टस जितेर पहिले ब्याटिङ गरेको रोल्पाले बिर्सनलायक प्रदर्शन गर्‍यो । १० दशमलव ४ ओभरमा सबै विकेट गुमाएर जम्मा २५ रन बनाएको रोल्पाका लागि दुर्गेश पुरीले सबैभन्दा धेरै १३ रन जोडे । उनले २७ बलमा ३ चौकासहित १३ रन जोडेर शुभम खनालको बलमा बोल्ड आउट भए ।

आकाश गुरुङले २ रन र अक्रम अलीले २ रन बनाए । अरु खेलाडीले खाता नै खोल्न सकेनन् । रोल्पाका ९ विकेट बोल्डआउटका रुपमा खसेको थियो ।

८ दशमलव ३ ओभरमा ५ विकेट गुमाउँदै २४ रन जोडेको रोल्पाले थप १ रन जोड्दा पाँच विकेट गुमायो । रोल्पाको ब्याटिङ लाइनअप धरासयी पार्न दाङका स्पिनरद्वय शुभम खनाल र किशन भारतीले घातक बलिङ गरे ।

शुभम खनालले १ दशमलव ४ ओभर बलिङ गर्दै जम्मा २ रन खर्चेर ३ विकेट लिँदा एउटा रन आउट पारे ।

किशन भारतीले पनि २ ओभर बलिङ गर्दै ४ रन खर्चेर ३ विकेट हात पारे  । दाङका लागि बीरबहादुर घर्तीले २ ओभर बलिङ गर्दै २ मेडनसहित शून्य रनमा १ विकेट लिए । दिनेश बोहराले २ ओभरका १ मेडनसहित ३ रन दिएर १ विकेट लिँदा करण जिएमले १ ओभरमा १ रन दिएर १ विकेट लिए ।

कसिलो बलिङ गर्दै रोल्पालाई कम रनमा अलआउट गराउन महत्त्वपूर्ण भूमिका खेलेका दाङका शुभम खनाल 'प्लेयर अफ दि म्याच' भए ।

प्रदेशमा क्रिकेटको विकासका लागि खेलकुद परिषद्‌ले लुम्बिनीका खेलाडीलाई एकै थलोमा राखेर प्रतियोगिता आयोजना गरेको लुम्बिनी प्रदेश खेलकुद परिषद्‌का सदस्य कैलाश रोका मगरले बताए ।