बुटवल — चर्च ब्वाइज युनाइटेडले २३ औं तिलोत्तमा गोल्डकप फुटबल प्रतियोगिताको फाइनल तय गरेको छ ।

देवीनगरस्थित एन्फा टेक्निकल मैदानमा बिहीबार दोस्रो सेमिफाइनलमा चर्च ब्वाइजले ए डिभिजन प्रतिद्वन्द्वी मछिन्द्र एफसीलाई ४–१ ले पराजित गरेको थियो । चर्च ब्वाइजको जितमा अर्मान्ड बेएडुमले ह्याट्रिक गरे भने कप्तान अबायोमी फाकुल्नेले एक गोल थपेका थिए । मछिन्द्रका एलेक्स विलियम्सले एक गोल फर्काए ।

प्रवेश कटुवालको क्रसमा अर्मान्डले हेडर गर्दै गोल गरेर टोलीलाई अग्रता दिलाए । त्यसको १० मिनेटपछि मछिन्द्रका कप्तान करिम ओमोलाजाले अर्मान्डलाई बक्समा लडाए । त्यसैमा प्राप्त पेनाल्टीलाई अर्मान्डले गोलमा परिणत गरेर अग्रता दोब्बर पारे । उनले ४४ औं मिनेटमा ह्याट्रिक पूरा गरे । राज भुसालले मिलाएको बलमा मछिन्द्रका गोलकिपर टोप रानामगरलाई बिट गर्दै अर्मान्डले गोल गरे । प्रतियोगितामा यो दोस्रो ह्याट्रिक हो । यसअघि संकटाका सृजनराज गौतमले ह्याट्रिक गरेका थिए ।