दाङ — लमहीमा जारी प्रधानमन्त्री कप पुरुष क्रिकेट प्रतियोगिता २०८१ अन्तर्गत सोमबार कर्णाली प्रदेश र बागमती प्रदेश टिम भिड्दैछन् ।

लमहीस्थित देउखुरी अन्तर्राष्ट्रिय क्रिकेट रंगशालामा आज दुई टिमबीच बिहान ९ बजेपछि खेल सुरु हुनेछ । दाङमा पहिलो पटक आयोजना गरिएको पिएम पुरुष क्रिकेट प्रतियोगितामा अंक तालिकाको चौथो स्थानमा रहेको कर्णाली प्रदेश र छैटौं स्थानमा रहेको बागमती प्रदेश टिमबीच खेल हुन लागेको हो ।

अहिलेसम्म ७ खेल खेलिसकेको कर्णाली प्रदेश ४ मा जित र ३ मा हार व्यहोर्दै ८ अंकका साथ चौथो स्थानमा रहँदा समान ७ खेल खेलिसकेको बागमती प्रदेश ३ खेलमा जित र ४ खेलमा हार व्यहोर्दै ६ अंकका साथ अंक तालिकाको छैटौं स्थानमा छ । 

कर्णाली प्रदेशमा कप्तान पुनसँगै रविन्द्र शाही, सुनिल धमला, निश्चल रावल, विपिन रावल, दीपेन्द्र रावत, अर्जुन घर्ती, हिमांशु जोशी, दिनेश अधिकारी, प्रकाश जैशी, अनुज चनारालगायत खेलाडी छन् ।

बागमती प्रदेशको कप्तानी पृथु बास्कोटाले सम्हालेका छन् भने कर्णाली प्रदेशको कप्तानी दिवान पुनले सम्हालेका छन् । बागमतीमा कप्तान बास्कोटासँगै आशुतोष घिरैया, इशान पाण्डे, शुभ कंशाकार, सौरभ सुखाकर्मी, विपिन आचार्य, सोनु देवकोटा, रिजन ढकाल, गौतम केसी, सूर्य तामाङ, साकार गजुरेललगायत खेलाडी छन् ।

अंक तालिकाको चौथो स्थानमा रहेको कर्णालीले खेलमा जित निकाल्दै स्थान सुधारलाई निरन्तरता दिन चाहन्छ भने बागमती प्रदेशको टिमले पनि कर्णालीलाई हराउँदै अंक तालिकाको माथि उक्लिन चाहन्छ ।

नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगितामा ३ विभागीय टिम आर्मी क्लब, एपीएफ क्लब र नेपाल पुलिस क्लबसहित सात प्रदेश टिमले फागुन २५ गतेबाट लुम्बिनी प्रदेशको रुपन्देही र दाङमा प्रतियोगिता खेलिरहेका छन् । राउण्ड रोबिनका आधारमा भइरहेको प्रतियोगिता चैत १६ गतेसम्म चल्नेछ ।