दाङ — लमहीमा जारी प्रधानमन्त्री कप एकदिवसीय पुरुष क्रिकेट प्रतियोगिता २०८१ अन्तर्गत आज बाग्मती प्रदेश र कोशी प्रदेश टीम भिड्दैछन् ।

लमहीस्थित देउखुरी अन्तर्राष्ट्रिय क्रिकेट रंगशालामा बिहान ९ बजेदेखि खेल सुरु भएको छ । दाङमा पहिलो पटक आयोजना गरिएको पिएम पुरुष क्रिकेट प्रतियोगितामा अंक तालिकाको आठौँ स्थानमा रहेको बाग्मती प्रदेश र नवौंमा रहेको कोशी प्रदेश टीमबीच खेल हुन लागेको हो ।

अहिलेसम्म ६ खेल खेलीसकेको बाग्मती २ मा जीत र ४ मा हार व्यहोर्दै ४ अंकका साथ आठौं स्थानमा रहँदा समान ६ खेल खेलिसकेको कोशी प्रदेश १ खेलमा जीत र ५ खेलमा लगातार हार व्यहोर्दै २ अंकका साथ अंक तालिकाको नवौं स्थानमा छ । 

बाग्मतीको कप्तानी अनुभवी खेलाडी पृथु बास्कोटाले सम्हालेका छन् भने कोशी प्रदेशको कप्तानी अंकित सुवेदीले सम्हालेका छन् । बाग्मतीका लागि बास्कोटासँगै आसुतोष घिरैया, इशान पाण्डे, शुभ कंशाकार, सुमन सुनार, विवेक मगर, सूर्य तामाङ, रिजन ढकाल, विपिन आचार्य, गौतम केसी, साकार गजुरेललगायत खेलाडी छन् ।

कोशी प्रदेशमा कप्तान सुवेदीसँगै चिराग साह, सकिब हक, सुजन थपलिया, सोनु अन्सारी, सुभम गहतराज, दिपेश कँडेल, भुपाल लुइँटेल, विपिन महतो, श्रवण किस्कु, प्रकाश कार्कीलगायत खेलाडी छन् ।