पाँचथर — पाँचथरको फिदिममा आयोजित पाँचौं संस्करणको पाँचथर गोल्डकपमा नमोबुद्ध फुटबल क्लब सप्तरीका विदेशी खेलाडी एलेक्सले तीन गोल गरे। खेल अवधिमा सर्वाधिक गोल गरेका उनलाई हाइ स्कोररको विधागत पुरस्कार दिइयो।

मच्छिन्द्र फुटबल क्लब काठमाण्डौका तर्फबाट खेलेका अर्का विदेशी खेलाडी स्टेफन र चर्च ब्वाइजका फोफोनाले समान २–२ गोल गरे। नाइजेरिया र कम्बोडियाबाट आएका यी तीनजना विदेशी खेलाडी पछिल्लो समय नेपालमा बसेर नेपाली फुटबल टिमबाटै खेल्ने प्रतिनिधि खेलाडी हुन्।

पछिल्लो समय नेपालका ए डिभिजनसँगै मोफसलका क्लबहरूले नाम चलेका फुटबल प्रतियोगिता जित्नकै लागि विदेशी खेलाडी मैदानमा उतार्दै आएका छन्। बजारमा मात्रै नभई ग्रामीण भेगमा आयोजना हुने पाँच लाख रुपैयाँभन्दा धेरै पुरस्कार राशिका प्रतियोगितामा भाग लिने क्लबहरूले पछिल्लो समय विदेशी खेलाडीलाई प्राथमिकता दिन थालेका छन्।

गत फागुन २४ देखि चैत २ गतेसम्म सञ्चालन भएको पाँचथर गोल्डकपको पाँचौं संस्करणमा आयोजक पाँचथर क्लबले दुई जना विदेशी खेलाडी मैदानमा उतारेको थियो। त्यसै बेला झापामा आयोजित मेची नगर गोल्डकप र विराटनगरमा आयोजित विराट गोल्डकपमा भाग लिएका चर्च ब्वाइज र मच्छिन्द्र फुटबल क्लबले प्रत्येक खेलमा दुई-दुई जना विदेशी खेलाडी मैदानमा उतारेका थिए।

पाँचथर गोल्डकप मात्रै नभई गत पुषमा सम्पन्न एघारौं फाल्गुनन्द गोल्डकपमा सहभागी १० मध्ये ८ टिमले दुई-दुई जना विदेशी खेलाडी मैदानमा उतारेका थिए। पाँचथर गोल्डकपमा सहभागी ८ मध्ये भारतको हिल्स फुटबल एकेडेमी र नेपाल पुलिस क्लब बाहेक ६ टिमले विदेशी खेलाडीलाई टिममा समावेश गरेका थिए। यसअघि गत पुसमा फिदिममै सम्पन्न एघारौं संस्करणको फाल्गुनन्द गोल्डकपमा सहभागी १० मध्ये ८ टिम र पुषमै इलाममा सम्पन्न माइभ्याली गोल्डकपमा सहभागी अधिकांश टिममा विदेशी खेलाडी थिए।