दाङ — लमहीमा जारी नेपाल टेलिकम प्रधानमन्त्री कप एक दिवसीय पुरुष क्रिकेट प्रतियोगिता २०८१ अन्तर्गत आज विभागीय टोली त्रिभुवन आर्मी क्लब र गण्डकी  प्रदेश टीम भिड्दैछन् । देउखुरी अन्तर्राष्ट्रिय क्रिकेट रंगशालामा आज बिहान दुई टीमबीच खेल सुरु भएको छ। आर्मी क्लवले टस जितेर बलिङ सुरू गरेको छ ।

दाङमा पहिलो पटक आयोजना गरिएको पीएम पुरुष क्रिकेट प्रतियोगितामा अंक तालिकाको दोस्रो स्थानमा रहेको आर्मी क्लब र पुछारमा रहेको गण्डकी प्रदेश टीमबीच खेल हुन लागेको हो ।

अहिलेसम्म ६ खेल खेलीसकेको आर्मी ५ मा जीत र १ मा हार व्यहोर्दै १० अंकका साथ दोस्रो स्थानमा रहँदा समान ६ खेल खेलिसकेको गण्डकी प्रदेश १ खेलमा जीत र ५ खेलमा लगातार हार व्यहोर्दै २ अंकका साथ अंक तालिकाको दशौं स्थान अर्थात् पुछारमा छ । 

आजको खेलमा आर्मीले गण्डकी विरुद्ध जीत निकाल्दै शीर्ष दुईमा कायम रहन चाहन्छ भने मधेश प्रदेशले लगातारको हारको नतिजा उल्टाउँदै आर्मी विरुद्ध जीत निकाल्दै अंक तालिकामा पनि सुधार गर्न चाहन्छ । आर्मीको कप्तानी अनुभवी खेलाडी विनोद भण्डारीले सम्हालेका छन् भने गण्डकी प्रदेशको कप्तानी विपिन खत्रीले सम्हालेका छन् ।

आर्मीका लागि भण्डारीसँगै सोमपाल कामी, कुशल मल्ल, तृतराज दास, आकाश चन्द, साहब आलम, बसिर अहमद, नरेन साउद, सन्तोष कार्की, भीम सार्की, विवेक यादवलगायत खेलाडी छन् ।

गण्डकी प्रदेशमा कप्तान खत्रीसँगै अर्जुन कुमाल, समीर कँडेल, वंश क्षेत्री, दीपक डुम्रे, रोहित चन्द, सुजन गौतम, सुवास भण्डारी, चन्द्र पौडेल, सुदीप अर्याललगायत खेलाडी छन् ।

नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगितामा ३ विभागीय टीम आर्मी क्लब एपीएफ क्लब र नेपाल पुलिस क्लबसहित सात प्रदेश टीमले फागुन २५ गतेबाट लुम्बिनी प्रदेशको रुपन्देही र दाङमा प्रतियोगिता खेलीरहेका छन् । राउण्ड रोविनका आधारमा भईरहेको प्रतियोगिता चैत १६ गतेसम्म चल्नेछ ।