विराटनगर — पाँचौँ संस्करणको मिल्स गोल्डकप फुटबल प्रतियोगितामा उदयपुरको फ्युजन फुटबल क्लब गाईघाट सेमिफाइलनमा प्रवेश गरेको छ । उद्घाटन खेलमा आइतबार सप्तरीको प्रोगेसिल युवा क्लब फत्तेपुरलाई १-० गोलले पराजित गर्दै फयुजनले अन्तिम चारमा स्थान सुरक्षित गरेको हो ।
मिल्स गोल्डकप फुटबल ट्रस्टको आयोजनामा विराटनगरको जुट मिल खेल मैदानमा सुरु प्रतियोगितामा फ्युजनका युवराज थापाले निर्णायक गोल गरेका थिए । खेलको ६८ औं मिनेटमा उनले रितेस तामाङको क्रसलाई लाई उत्कृष्ट रूपमा जाली चुमाएका थिए ।
पहिलो हाफमा दुवै टिमले गोल गर्न सकेका थिएनन् । तर, दोस्रो हाफपछि भने सप्तरी रणनीति परिवर्तन गर्दै आक्रामक बन्यो । तर, गोलका लागि गरेका पटक-पटकका प्रयत्न खेर गए । ६२ औं मिनेटमा बिनु मगरले डिबक्स भित्रबाट कडा प्रहार गरे । तर, त्यो प्रहार बारको माथिबाट बाहिरियो । पुष्पराज चौधरीले गरेको अर्को प्रहार उदयपुरका गोलकीपर अनिल मगरले उत्कृष्ट बचाउ गरे । ७०औं मिनेटमा सप्तरीका कप्तान सुशिल कुमार यादवको प्रयास पनि गोलरक्षक अनिलले निस्तेज तुल्याइदिए ।
प्रतियोगिताको प्लेयर अफ द म्याच उदयपुरका गोलकिपर अनिल मगर भए । उनले नगद २ हजार १ सय पुरस्कार पाए । विराटनगर महानगरका प्रमुख नागेश कोइरालाले उद्घाटन गरेको प्रतियोगिताका विजेताले १ लाख १ हजार तथा उपविजेताले ५१ हजार रुपैयाँ पाउनेछन् ।
प्रतियोगितामा भारतको एक टिमसहित कोशी प्रदेशका ८ वटा टिमको सहभागिता छ । फाइनल आगामी चैत १० गते हुने छ । सोमबारको खेल पेमा स्पोर्टिङ क्लब र कोशी प्रदेश प्रहरी कार्यालय विराटनगरबीच हुनेछ ।
