तिलोत्तमा — सुनगाभा सैनामैना गोल्डकपमा बुधबारको खेलबाट अभिषेक चर्च नवलपुर सेमिफाइनलमा प्रवेश गरेको छ । उसले सशस्त्र पुलिस क्लब लाई २-१ ले हराएको हो ।
खेल सुरु भएको २ मिनेटमै अभिषेक चर्चका सूचित बुढाथोकीले गोल गर्दै आफ्नो टिमलाई अग्रता दिलाए । प्रतिस्पर्धात्मक खेलको ११ औं मिनेटमा सशस्त्रका भरत कपालीले गोल गरे । दुवै टिमले राम्रो प्रदर्शन गरे पनि गोल रक्षकले गोल हुनबाट जोगाइरहेका थिए ।
खेलको दोस्रो हाफमा अभिषेक चर्चका शक्ति गुरुङले गोल थप्दै टिमलाई २-१ को अग्रता दिलाए । सशस्त्र बाट अर्को प्रहार हुन नसकेपछि अभिषेकले खेल जित्यो । खेलमा उत्कृष्ट खेलेका अभिषेक चर्च नवलपुरका खेलाडी सुजित बुढाथोकी म्यान अफ द म्याच घोषित भए । बिहीबारको खेल महावीर क्लब काठमाडौँ र हनामी बीएफसी चितवनबीच हुने खेल संयोजक अशोक खड्काले बताए ।
प्रतियोगितामा पहिलो स्थान हासिल गर्ने टिमले ७ लाख र दोश्रो हुने टिमले ४ लाख, ट्रफी, मेडल र प्रमाणपत्र प्राप्त गर्नेछ ।
