मछिन्द्रले सेमिफाइनलमा केपी ओली एफसीलाई हराएको थियो । त्यस अगाडि उसको जित भुटान एफसी ट्रान्सपोर्ट युनाइटेडविरुद्ध थियो । आर्मीले भने पहिलो खेलमा पुलिसलाई हराएको थियो । सेमिफाइनलमा उसको जित संकटाविरुद्ध थियो । मछिन्द्रका आफ्नो समकक्षी प्रशिक्षकभन्दा अनुभवमा धेरै अगाडि रहेका आर्मीका मेघराज केसी मान्छन्, दुवै टिम राम्रो भएर नै फाइनल पुगेका हुन् ।

त्यसैले फाइनल राम्रो हुने अपेक्षा गर्न सकिन्छ । उनको विश्लेषण रहेको छ, मछिन्द्रको राम्रो भनेको विदेशी र नेपाली खेलाडीको बलियो समिश्रण हो । अनि आर्मीको बलियो पक्ष भनेको युवा खेलाडीको जोस । उनी भन्छन्, ‘यसअघिका दुई खेलमा देखिएका कमजोरीलाई सुधारेर खेल्नेछौं । मछिन्द्रको बलियो पक्षलाई रोकेर उसको कमजोर पक्षमा धावा बोल्नेछौं ।’

उनी नयाँ खेलाडीलाई लिएर आर्मी टिम बनाउने योजनामा छन् र नतिजा पनि बिस्तारै आउँदै जाने मान्छन् । आर्मीका कप्तान जिलेप्सीजंग कार्की आफ्नो प्रशिक्षककै रणनीतिअनुसार खेल्ने मान्छन् । उनी भन्छन्, ‘सबैले मिहिनेत गरेर नै हामी यहाँसम्म पुगेका हौं । फाइनलका लागि योजना बनाएका पनि छौं र त्यसैअनुसार खेल हुनेछ ।’