भद्रपुर — आयोजक भद्रपुर ब्लेजर्स नै भद्रपुर झापा गोल्डकप फुटबल प्रतियोगितामा च्याम्पियन भएको छ । आयोजकले ट्रफीसहित १३ लाख रुपैयाँ जित्यो । भद्रपुरस्थित मेची रंगशालामा शुक्रबार फाइनलमा आयोजकले झापा ११ एफसीलाई २–० गोलले हराएको थियो । दुवै घरेलु टोलीबीचको प्रतिस्पर्धा रोचक बनेको थियो ।

खचाखच दर्शक उपस्थितिमा भद्रपुरले खेलको ३० औं मिनेटमा अग्रता लियो । मिलन राईको छोटो पासमा कप्तान आशिष चापागाईंले प्रहार गरेको बलले पोस्टको दिशा लिएको थियो । त्यसपछि इन्ज्युरी समयमा भद्रपुरका लागि सत्यम् शर्माले गोल थपेर जित सुनिश्चित गरे । अवायोमीको हेड बलमा २५ यार्डको दूरीबाट गरेको सत्यम्को सशक्त प्रहार गोलमा परिणत भयो ।

खेलको १४ औं मिनेटमा भद्रपुरका विवेक पौडलको प्रहार क्रसबारबाट बाहिरियो । खेलको ४० औं मिनेटमा भद्रपुरका कुलदीप कार्कीले लामो दुरीमा गरेको प्रहारविदेशी खेलाडी अवायोमीको हेडरलाई झापाका गोलकिपर सन्दीप लिम्बूले बचाए ।

खेलको ५२ औं मिनेटमा अवायोमीको पासमा मिलन राईको प्रहार सन्दीपले नियन्त्रणमा लिए । झापाका रोहन कार्की खेलको १८ औं मिनेटमा चुके । खेलको २३ औं मिनेटमा समीर तामाङको प्रहार पोस्ट नजिकैबाट बाहिरियो ।

समीर तामाङले खेलको ४३ औं मिनेटमा खेल बराबरी ल्याउने अवसर गुमाए । बबिन बोहराको पासमा समीरको प्रहार बारमा लागेर फर्कियो । खेलको ७८ औं मिनेटमा हरिबहादुर आले मगरले बक्सभित्रबाट गरेको सशक्त प्रहार पनि सफल भएन । प्लेयर अफ द म्याच भद्रपुरका विशाल दर्जी भए । उनले २१ हजार र ट्रफी पाए । सर्वोत्कृष्ट खेलाडी भद्रपुरका कप्तान आशिष चापागाईं भए । उनले १ लाख ५ हजार र ट्रफी पाए ।

उदीयमान खेलाडी भद्रपुरका राजेश शाह, उत्कृष्ट गोलकिपर भद्रपुरका टेकेन्द्र थापा, सर्वाधिक गोलकर्ता भद्रपुरका सत्यम् शर्मा र उत्कृष्ट प्रशिक्षक भद्रपुरका सचिन्द्र धिमाल भए । उनीहरूले जनही २५ हजार पुरस्कार पाए । फाइनलमा भाग्यशाली दर्शकमा भोजपुरका एन्जल चर्मकारले टीभीएस राइडर मोटरसाइकल जिते । भद्रपुरका विक्रम बरालले सुनको सिक्री र भद्रपुरका राजेशकुमार गुप्ताले ५० हजार नगद पाए ।