काठमाडौँ — ब्रेन्टफोर्डले इंग्लिस प्रिमियर लिगमा लेस्टर सिटीमाथि शुक्रबार एकपक्षीय जित रचेको छ ।

किङ पावर स्टेडियममा भएको खेलमा ब्रेन्टफोर्ड ४–० ले विजयी रह्यो । यो हारले लेस्टरको रेलिगेसनबाट बच्ने संघर्ष अझ कठिन भएको छ ।

लेस्टर १७ अंकमा पुछारबाट दोस्रो स्थानमा छ । ब्रेन्टफोर्डको भने ३७ अंक भएको छ र १० औं स्थानमा छ । आफ्नो घरेलु मैदानमा लेस्टरको यो लगातार छैटौं हार हो । यी सबै हारमा लेस्टरले एक गोल पनि गर्न सकेको छैन ।

यस्तै लेस्टर पछिल्ला ११ खेलमध्ये १० मा पराजित रहेको छ । ब्रेन्टफोर्डका लागि भने योना विसा, ब्रायन एमबुमो, क्रिस्टियन नोरगार्ड र फाबियो कारभेल्होले गोल गरे ।