काठमाडौँ — नेपाली महिला फुटबल अहिले त्यो मोडमा पुगेको छ, जहाँ तथ्यांकसँग खेलेर धेरैथोक भन्न सकिन्छ । सबैभन्दा पहिले कप्तान एन्जिला तुम्बापो सुब्बाकै कुरा । दुई वर्षजति अगाडि काठमाडौंमै ओलम्पिक छनोट खेल भएको थियो, भियतनामविरुद्ध ।

त्यसमा नेपाल दुवै खेल हारेको थियो र टिममै एन्जिलाको स्थिति लिएर प्रश्न गरिएको थियो । यसबारे पत्रकारको उत्तर दिँदा एन्जिला खुबै भावनात्मक भएकी थिइन्, आफूलाई रुनबाट रोक्नै सकिनन् ।तिनै एन्जिलाको नेतृत्वमा नेपालले फोर नेसन्स कपको आफ्नो पहिलो खेल किर्गिस्तानविरुद्ध खेलेको थियो । 

व्यक्तिगत उपलब्धिको रूपमा यो उनका लागि विशेष रह्यो । नेपाली महिला फुटबलले अन्तर्राष्ट्रिय सहभागिता जनाउन थालेको ४० वर्ष छुन लाग्दा अहिलेसम्म ११ खेलाडीले टिमको नेतृत्व गर्ने अवसर पाएका छन् । देशका लागि खेल्नु नै ठूलो मानिन्छ । अझ कप्तानीको उपलब्धिकति ठूलो हुन्छ, सजिलै अनुमान गर्न सकिन्छ । 

यही पृष्ठभूमिमा एन्जिला सबैभन्दा बढी खेलमा कप्तान हुने नेपाली खेलाडी बनेकी छन् । किर्गिस्तानविरुद्धको खेल उनको नेतृत्वमा खेलेको २० औं खेल हो । उनले यसक्रममा निरु थापालाई उछिनेकी हुन् । निरुले १९ खेलमा नेपालको कप्तानी गरिन् । अब एन्जिलाले नेतृत्व गरेको खेलसंख्या २० पुगेको छ । यसैक्रममा उनले एउटा अर्को तथ्यांकमा पनि निरुलाई उछिनकी छन् । निरुको कप्तानीमा खेलिएका १९ खेलमा ९ जित हात परेको थियो । 

किर्गिस्तानविरुद्धको जित भने एन्जिलाको नेतृत्वमा प्राप्त नेपालको दसौं जित भयो । कप्तानका रूपमा सबैभन्दा बढी खेल जित्ने होडमा भने उनी दोस्रो स्थानमा छन् । उनले भन्दा बढी जमुना गुरुङले १३ जित आत्मसात् गरेकी छन्, कप्तानका रूपमा । अझै एन्जिलाले कप्तानका रूपमा नेपालका लागि खेल्ने क्रम रोकिने छैन । यस्तोमा उनको नाममा धेरै कीर्तिमान जोडिनेछ । सायद आफूविरुद्धको आलोचनाले एन्जिलालाई अझ बलियो बनाएको हुनुपर्छ । 

उनी पनि युरोपमा खेल्ने भइसकिन् । उनकै भाषामा आत्मविश्वास अझ बढ्दो छ । अझै पनि एन्जिलाका खेलमा केही कमजोरी छन् । तिनमा सुधार हुनैपर्छ । कमजोरी नै नहुने खेलाडी को होला र ? प्रश्न के मात्रै भने उनीमाथि गरिएका आलोचना आफैंमा कति ठीक थिए भन्ने मात्रै हो । किर्गिस्तानविरुद्धको खेल सावित्रा भण्डारीका लागि पनि विशेष रह्यो । उनका लागि फोर नेसन्स कपको त्यो खेल ५० औं ‘क्याप’ रह्यो । 

महिला खेलाडीका रूपमा नेपाली राष्ट्रिय टिमका लागि यो आँकडा छुने धेरै कम खेलाडीमात्र छन् । त्यसमा उनी पनि जोडिएकी छन् । सावित्रा युरोपमा खेल्छिन् र उनका सामु पनि अझै सम्भावना जीवन्त छ । चोट र बिरामीले दुःख नदिएको भए सावित्राको नाममा अझ बढी खेल हुन्थ्यो । बढी खेलकै कुरा गर्दा नेपाली महिला फुटबलमा नेपालका लागि सबैभन्दा बढी खेल खेल्ने खेलाडी को हो त ? यसको उत्तर यही किर्गिस्तानविरुद्धको खेलमा रहेको थियो ।