सुनसरी — बुढासुब्बा गोल्डकप फुटबलको २५ औं संस्करणको फाइनलमा साबिक बिजेता एनआरटीले चर्च ब्वाइज युनाइटेडविरुद्ध शनिबार प्रतिस्पर्धा गर्दै छ । धरान रंगशालामा हुने फाइनल प्रतिस्पर्धात्मक हुने दुवै टिमको दाबी छ । शुक्रबार प्रिम्याच कन्फ्रेन्समा दुवै टिमका कप्तान र प्रशिक्षकले उपाधि जित्ने दाबी गरे ।

दुवै कप्तान र प्रशिक्षकले एकअर्कासँग परिचित भएकाले कमजोर नआँक्ने बताए । एन्फाले प्रतियोगिता जुधाएकै कारण एनआरटी र चर्च ब्वाइजका केही खेलाडीको धरान–पोखरा–धरान दौडधुपको कारण उत्कृष्ट प्रदर्शनमा केही कमी आउने दुवै टिमका प्रशिक्षक स्वीकार्छन् ।

एउटै क्लबबाट दुई टिम बनाएर आहा–रारा गोल्डकपमा सहभागी यी टिमबीच प्रतिस्पर्धा शनिबार धरान रंगशालामा हेर्न दर्शकसमेत आतुर छन् । एनआरटी यस सिजनमा ४ प्रतियोगितामा सहभागी भइसकेकाले पनि बुढासुब्बाको फाइनलमा चर्च ब्वाइजसँग प्रतिस्पर्धा गर्न सहज हुने प्रशिक्षक श्याम मालीले बताए ।

उनले राष्ट्रिय खेलाडी अञ्जन बिष्टलाई पोखराबाट धरान झिकाउने तयारी रहेको बताए । यसअघि १० औं संस्करणको उपाधि जितेको साबिक बिजेता एनआरटी उपाधि संख्या बढाउन र इतिहास दोहोर्‍याउन सक्षम रहेको कप्तान सरोज तामाङले बताए । क्वाटरफाइनलमा झापाको काँकंडभिटा फुटबल टेनिङ सेन्टरलाई ३–१ गोलले पराजित गरेको एनआरटीले सेमिफाइनलमा युकेएफसी भारतलाई ३–१ गोलले पराजित गरेको थियो ।