मकवानपुर — रुपेश जैसवाल र सिन्दिरा जोशी क्रमश : पुरुष र महिलातर्फ राष्ट्रिय बुद्धिचाल च्याम्पियन भएका छन् । हेटौंडा एक सातासम्म चलेको बुद्धिचाल प्रतियोगितामा रौतहटका रुपेश जैसवाल ९ अंक जोडेर २५ औं राष्ट्रिय चेस च्याम्पियन बनेका छन् । उनको यो दोस्रो राष्ट्रिय उपाधि हो ।

रुपेशले चौथो वरीयताबाट खेल प्रारम्भ गर्दै सात जित, चार बराबरी खेले । उनले आफ्नो व्यक्तिगत रेटिङ २०९३ बाट खेल सुरु गरेर ३०.२ रेटिङ बढाएका छन् । समग्रमा उनको उत्कृष्ट रेटिङ पर्फमेन्स २२११ रह्यो । 

युवा पुरुषोत्तम सिलवालले टाइब्रेकरका आधारमा दोस्रो बन्दै प्रतिस्पर्धा अन्त्य गरेका छन् । वर्तमान नेपाल च्याम्पियन राजन सुवेदीसँग समान ८.५ अंक बनाएका पुरुषोत्तमको ३७.२५ टाइब्रेक प्वाइन्ट र राजन ३६.२५ मा सीमित भए । झापाका राजन तेस्रो स्थानमा अडिए ।

मकवानपुरका एफएम क्षितिज भण्डारीले ८ अंक बनाइ चौथो स्थान प्राप्त गरेका छन् । दोलखाका आशीष फुयाँल ७ अंक जोडेर पाँचौं स्थानमा रहे । झापाका सिएम शुश्रुत दहाल ६.५ अंकसहित सातौं, काठमाडौंका एफएम रिजेन्द्र राजभण्डारी ६ अंक आठौं, प्रेमकृष्ण महर्जन नवौं र ललितपुरका सुरोज महर्जन दशौं भए ।

नेपाल बुद्धिचाल महासंघको आयोजनामा सञ्चालन भएको १० औं महिला राष्ट्रिय वुमन च्याम्पियन सिन्दिरा जोशीले ९ अंक बनाएकी छिन् । उनले उत्कृष्ट खेल खेली उपाधि जोगाउन सफल भएकी छिन् । 

लामो समय चेस खेलमा व्यतीत गरेकी पुनम प्रसाईंले ८ अंक जोडेर दोस्रो भएकी छिन् । कडा प्रतिस्पर्धामा झापाका पुनमले टाइब्रेक प्वाइन्ट ३८.७५ प्राप्त गरी दोस्रो भइन् । बाँकेका इशा गिरीले ८ अंक टाइब्रेक प्वाइन्ट ३६.२५ का आधारमा तेस्रो स्थान हासिल गरेकी हुन् । उदीयमान इशाले पहिलो प्रयासमा नै नेपाल तृतीय बनेकी हुन् ।