काठमाडौँ — नेपाल कबड्डी लिग (एनकेएल) शुक्रबारदेखि दशरथ रंगशालास्थित राखेप कभर्डहलमा सुरु हुँदै छ । त्यसमा प्रतिस्पर्धी ६ फ्रेन्चाइज टिमको एउटै लक्ष्य हो, उपाधि जित्ने ।

प्रतियोगिताको पूर्वसन्ध्यामा आयोजित प्रि–म्याच कन्फ्रेन्समा सबै टिमका प्रशिक्षक र मार्की खेलाडीको दाबी थियो, उपाधिको दाबेदारी उनीहरू आफैं हुन् । नेपालमा पहिलोपल्ट हुन लागेको कबड्डीको फ्रेन्चाइज लिगमा विराटनगर ब्यान्डिट्स, जनकपुर नाइट्स, काठमान्डु माभरिक्स, पोखरा लेकर्स, हिमालयन रेइडर्स र धनगढी वाइल्डक्याट्सले एनकेएलमा प्रतिस्पर्धा गर्नेछन् । लिगको शीर्ष चार टोलीले प्ले–अफमा स्थान बनाउने छ । पहिलो खेलमा काठमान्डु माभरिक्स र पोखरा लेकर्स भिड्नेछन् ।

नेपाली राष्ट्रिय टोलीका कप्तान तथा भारतको प्रो कबड्डी लिग खेलिसकेका घनश्याम रोकामगर काठमान्डुका मार्की हुन् । काठमान्डुले नेपालका पूर्व कप्तान सरोज सिंहको प्रशिक्षणमा तयारी गरेको छ । पोखरा लेकर्सको मार्कीमा प्रदीप मिजार छन् । राष्ट्रिय टोलीमा पनि प्रशिक्षण दिइसकेका विष्णुदत्त भट्टको प्रशिक्षणमा पोखरा उत्रँदै छ ।