काठमाडौँ — नेपाल आईसीसी महिला यू–१९ ट्वान्टी–२० विश्वकपको दोस्रो अभ्यास खेलमा पनि पराजित भएको छ । पहिलो खेलमा वेस्ट इन्डिजसँग ९ रनले पराजित नेपाललाई बुधबार अमेरिकाले ५ विकेटले पराजित गर्‍यो । अमेरिकाले पहिलो अभ्यास खेलमा न्युजिल्यान्डलाई पराजित गरेको थियो ।

मलेसियाको क्वालालम्पुरस्थित रोयल सेलेन्गर क्लबमा टस हारेपछि ब्याटिङमा आएको नेपालले निर्धारित २० ओभर खेली ९ विकेट गुमाई ५८ रन मात्र बनाउन सकेको थियो । सावित्री धामी ५, सना प्रवीण १२, कप्तान पूजा महतो १०, उपकप्तान सोनी पाख्रिन ४, किरण कुँवर शून्य, ज्योत्सनिका मरासिनी ६, तृष्णा विश्वकर्मा २, सिमान केसी ६, अलिसा यादव १ रनमा आउट भए । अनु कडायत ३ र रचना चौधरी ४ रनमा अविजित रहे ।