जनकपुर — नेपाल पुलिस क्लबले जनकपुरको रामजानकी बहुउद्देश्यीय रंगशालामा आइतबार बागमती प्रदेशलाई ५ विकेटले पराजित गरेको छ । पुलिसले यस विजयसँगै फाइनलको औपचारिकता पनि पूरा गरेको थियो । 

पहिलो खेलमा विभागीय प्रतिद्वन्द्वी त्रिभुवन आर्मी क्लबसित बराबरीमा रोकिएको पुलिसले दोस्रो खेलमा मधेश प्रदेशलाई एक इनिङ्स र ३२ रनले पराजित गरेको थियो । बागमतीसँग विजय हात पार्न पुलिसलाई खासै ठूलो चुनौतीको सामना गर्नु परेन । 

पुलिसले १ सय १६ रनको लक्ष्य २३ ओभरमा पूरा गरेको थियो । ओपनर दिलीप नाथ ४ रनमा आउट भए पनि कुशल भुर्तेल र अमित श्रेष्ठले आक्रामक खेल्दै ३२ बलमा ४३ रनको साझेदारी गरे । आरिफ शेखको अनुपस्थितिमा कप्तानी गरिरहेका कुशलले १९ बल खेली ४ चौका र २ छक्का प्रहार गर्दै ३२ रन बनाए । 

पहिलो इनिङ्समा पनि ७९ रन बनाएका अमितले दोस्रो इनिङ्समा पनि अर्धशतक बनाए । उनले ४५ बलमा ५६ रन बनाउने क्रममा ९ चौका प्रहार गरे । शंकर राना १ र रसिद खान शून्यमा आउट भए । अर्जुन साउद २० र प्रेम तामाङ १ रनमा अविजित रहे । बागमतीका कप्तान सन्दीप लामिछानेले २ तथा नन्दन यादव, प्रतिश जीसी र सूर्य तामाङले १–१ विकेट लिए । 

यसअघि बिनाक्षति ८ रनबाट दोस्रो दिनको खेल प्रारम्भ गरेको बागमतीको दोस्रो इनिङ्स ५३ ओभरमा २ सय १८ रनमा टुंगिएको थियो । इशान पाण्डे ३ रनमा आउट भएपछि रित गौतम र शुभ कंसाकारले दोस्रो विकेटमा १ सय ९ रन जोडेका थिए । ४४ बलमा अर्धशतक पूरा गरेका शुभले ७४ बलमा ७२ रन बनाए । उनले १० चौका र १ छक्का प्रहार गरे ।