काठमाडौँ — चर्च ब्वाइज युनाइटेड झापा कप फुटबल प्रतियोगिताको च्याम्पियन भएको छ । चर्च ब्वाइजले न्यूरोड टिम (एनआरटी) लाई सोमबार फाइनलमा ३–१ गोलअन्तरले हराउँदै उपाधि जितेको हो ।  उपाधिसँगै चर्च ब्वाइजले नगद १० लाख रुपैयाँ जित्यो । 

उपविजेता एनआरटी क्लबले ५ लाख रुपैयाँमा चित्त बुझायो । चर्च ब्वाइजले जितसँगै १० दिनअघि सम्पन्न इलाम गोल्डकपको फाइनलमा एनआरटीसँग बेहोरेको हारको बदला पनि लिएको छ । इलाम गोल्डकपको फाइनलमा चर्च ब्वाइजलाई एनआरटी क्लबले ३–० गोलअन्तरले पराजित गरेको थियो ।

बिर्तामोडको डोमालाल राजवंशी रंगशालामा भएको प्रतियोगिताको सुरुवातमा एनआरटीले बल पोजिसनमा राखेको थियो । तर खेलको २१औं मिनेटमा चर्च ब्वाइजले अग्रता लियो । चर्च ब्वाइजका समिर तामाङले एनआरटीका डिफेन्डरको मिसपासलाई सदुपयोग गर्दै गोल गर्न सफल भए । गोलरक्षकको हातबाट फुत्किएको बललाई मैदानको मध्यभागबाट उनले 'वानटच'मा जाली चुमाएका हुन् ।

४३औं मिनेटमा चर्च ब्वाइजले अग्रता दोब्बर बनायो । रोहन कार्कीले डिबक्समा मिलाइदिएको पासलाई डिबक्समा अनमार्क रहेका विदेशी खेलाडी अर्मान्डले गोल गरे । लगत्तै एनआरटीले १ गोल फर्कायो । विदेशी खेलाडी कार्लोसले दिएको क्रस पासमा कप्तानसमेत रहेका अञ्जन विष्टले गोल गर्दै नतिजा १–२ बनाएका थिए ।