काठमाडौँ — हेमन्त धामीले कप्तानी इनिङ्स खेलेपछि नेपालले एसीसी यू–१९ एसिया कप क्रिकेटमा मंगलबार अफगानिस्तानमाथि १ विकेटको रोमाञ्चक जित हात पारेको छ । 

यूएईमा भइरहेको प्रतियोगितामा अफगानिस्तानसँगको जितले नेपाललाई यू–१९ विश्वकप छनोटअघि ठूलो मनोबल प्रदान गरेको छ ।

शारजहाँ क्रिकेट रंगशालामा १ सय २४ रनको लक्ष्य पाएको नेपालले ८४ रन बनाउँदा ८ विकेट गुमाइसकेको थियो । हेमन्तले नरेन साउदसँग नेपाललाई विजय दिलाएका हुन् । अघिल्लो बलमा चौका प्रहार गर्दै स्कोर बराबरी गरेका हेमन्तले नै ४२ औं ओभरमा विजयी रन बटुलेका थिए ।

पहिलो खेलमा श्रीलंकासँग ५५ रन र दोस्रो खेलमा बंगलादेशसँग ५ विकेटले पराजित भएपछि नेपाल नै प्रतियोगिताबाट बाहिरिइसकेको थियो । अफगानिस्तान पनि यसअघि नै बंगलादेश र श्रीलंकासँग पराजित भएर समूह चरणबाटै बाहिरिएकाले दुवै टोलीका लागि सेमिफाइनल प्रवेशको हिसाबले यो खेलले कुनै महत्व राख्दैनथ्यो । तर, यू–१९ विश्वकप छनोटअघि यो जितबाट नेपालले ठूलो आत्मविश्वास बटुलेको छ ।

नेपालले अप्रिल १२ देखि २१ सम्म आईसीसी यू–१९ पुरुष विश्वकप छनोट आयोजना गर्दै छ । नेपालसहित अफगानिस्तान, हङकङ, यूएई र ओमानले प्रतिस्पर्धा गर्ने प्रतियोगिताको विजेता टोली २०२६ मा जिम्बावे र नामिबियामा हुने आईसीसी यू–१९ विश्वकपमा पुग्नेछ । नेपालले यसै वर्षको जनवरीमा दक्षिण अफ्रिकामा भएको यू–१९ विश्वकपमा पनि अफगानिस्तानलाई १ विकेटले नै हराएको थियो ।