काठमाडौँ — नेपाल भेटेरिनरी एसोसिएसनले प्रोटिनमाथिको अधिकारबारे जनचेतना फैलाउने उद्देश्यले पुस पहिलो साता हाफ म्याराथन आयोजना गर्ने घोषणा गरेको छ । १० लाखभन्दा बढी पुरस्कार राशि रहेको यो प्रतिस्पर्धालाई ‘रन फर प्रोटिन’ को नारा दिइएको छ ।

पुस ३ गते दशरथ रंगशालाबाट सुरु हुने खुला हाफ म्याराथन (महिला/पुरुष), पुरुष १० किमि, महिला ५ किमि, १२ कक्षासम्मका विद्यार्थीको छात्र ५ किमि र छात्रा ३ किमि तथा ह्वीलचियर रेस गरी पाँच विधा समावेश गरिएको छ । दौडलाई नेपाल एथलेटिक्स संघले प्राविधिक सहयोग गर्नेछ । करिब २ हजारको सहभागिता रहने अपेक्षा गरिएको यो रनका लागि २ सय रुपैयाँ दर्ता शुल्क तोकिएको छ । आयोजक भेटेरिनरी एसोसिएसनका अध्यक्ष डा. शीतलकाजी श्रेष्ठका अनुसार एकदिने कार्यक्रमका लागि करिब ७० लाख रुपैयाँ खर्च हुनेछ । एसोसिएसनको आफ्नै कोष तथा प्रायोजकहरूबाट खर्चको व्यवस्थापन गरिने उनले जानकारी दिए ।