'किर्ते कागजात बुझाएर वन डिभिजन कार्यालय मंगलसेनबाट अनुमति लिनेमा वन उपभोक्ता समितिकै सचिव'
अछाम — कमलबजार नगरपालिका-५ मा रहेको पाँचुल्ली वनमा किर्ते कागजातका भरमा वन पैदावारको अनुमति ल्याएर वन फडानी गरिएको खुलेको छ । पाँचुल्ली चैतेपातल सामुदायिक वन उपभोक्ता समितिको नाममा नक्कली कागजात बनाई सोही कागजातका आधारमा वन डिभिजन कार्यालय मंगलसेनबाट चोत्रो (डाँठ, पात, बोक्रा) पैदावार बिक्री गर्ने अनुमति लिएर फडानी सुरु भएको हो । यसरी अनुमति लिन पेस गरिएको कागजात नक्कली भएको र यस्तो काम समितिका सचिव छत्रराज तिमिल्सैनाको नेतृत्वबाट भएको खुलेको छ ।
सामुदायिक वन उपभोक्ता समितिले फागुन १२ गते साधारणसभा गरेर वन पैदावार बिक्री गर्ने निर्णय भएको कागजात वन डिभिजन कार्यालयमा पेश गरेपछि १३ हजार केजी चोत्रो पैदावारका लागि सहमति दिएको थियो ।
वन समितिका अध्यक्ष जय प्रकाश उपाध्यायले आफू ६ महिनादेखि जिल्लाबाहिर रहेकाले समितिको बैठक र सो मितिमा साधारणसभा नभएको बताए । ‘एक वर्षअगाडि भएको भेलाको उपस्थितिलाई फागुन १२ गतेको साधारणसभा भनेर कागजात तयार पारिएको रहेछ । वन समितिको अध्यक्ष म हो । ६ महिनादेखि म कैलाली छु । किर्ते कागजात तयार पारेर वन पैदावारको सहमति लिएको मैलै पनि भरखरै थाहा पाएको हुँ,’ उनले भने ।
एक वर्षअगाडि वनको भेलामा गरेको हस्ताक्षरलाई दुरुपयोग गरेर वन पैदावारको सहमति लिइएको कमलबजार-५ का खगेन्द्र उपाध्यायले बताए । ‘वन समितिका सचिवले डिभिजन वन कार्यालयमा बुझाएको कागजातमा फागुन १२ गते साधारणसभा गरेको भनेर मेरो पनि हस्ताक्षर देखेँ । पहिलेको उपस्थितिको दुरुपयोग गरियो,’ उनले भने, ‘किर्ते कागजात बनाएर वन पैदावार गर्ने सबैमाथि अनुसन्धान गरेर कानुनी दायरामा ल्याउनुपर्छ ।’
नक्कली कागजात बनाएर १३ हजार केजी चोत्रा पैदावारको सहमति ल्याएको र गाउँमा ४५ हजार केजी पैदावार गर्ने इजाजत छ भनेर सर्वसाधारणलाई वन समितिका मान्छेले नै झुक्याउने गरेको अर्का स्थानीय तपेन्द्र खत्रीले बताए । ‘वन समितिका मान्छे र अन्य सरोकारवालाको संलग्नतामा अवैध तरिकाले वन पैदावार भइरहेको छ । फागुन १२ गते भएको भनिएको साधारणसभामा मेरो हस्ताक्षर पनि राखिएको छ,’ उनले भने, ‘एक वर्षअगाडि सामुदायिक वनलाई नवीकरण गर्ने लगायतका विषयमा छलफल गर्न भेला बोलाइएको थियो । चोत्रा पैदावार गर्नेसम्बन्धी त्यो बेला पनि कुनै निर्णय भएको थिएन ।’
वन समितिका सचिव छत्रराज तिमिल्सैनाले किर्ते कागजात बनाएर वन पैदावरको सहमति लिएको कमलबजार-५ का अध्यक्ष सत्यराज तिमिल्सैनाले बताए । ‘किर्ते कागजात बनाएर वन पैदावर बनाएको विषयमा मैले वन समितिको सचिवलाई सोधेको थिएँ । वनपालेको तलब दिन पनि बाँकी रहेकाले यसबाट आम्दानी हुन्छ भनेर सामान्य सोचेर बनाइएको हुँ भन्ने जवाफ दिएका छन्,’ उनले भने, ‘यो विषय बाहिर आइसकेपछि ककसको संलग्नता छ भनेर मेरो नेतृत्वमा तीन सदस्यीय छानबिन समिति बनाउने विषयमा वन डिभिजनसँग सल्लाह भइरहेको छ ।’ पाँचुल्ली वनबाट चोत्रा निकाल्ने र नेपालगन्जतिरका केही ठेकदारमार्फत बेच्ने सल्लाह भएको जानकारी दिएको उनले बताए ।
सामुदायिक वन उपभोक्ता समितिका सचिवले नै ल्याएको कागजातमाथि विश्वास गरेर वन पैदावारका लागि अनुमति दिइएको डिभिजन वन कार्यालय अछामका अधिकृत गणेश ठगुन्नाले बताए । ‘साधारणसभाबाट निर्णय भएको कागजात ल्याएर वन समितिका सचिव नै आएकाले उनले ल्याएका कागजातमाथि बढी विश्वास गरेर अनुमति दिएका हौं,’ उनले भने , ‘सक्कली निर्णयबाट फोटोकपी गरेर ल्याएको हो भन्ने जवाफ दिए । हामीले सक्कली डकुमेन्ट हेर्नुपर्ने त हो तर बढी विश्वास गर्दा हामी चुक्यौं ।’
नक्कली काजगात बनाएर वन अनुमति लिइएको भन्ने सूचना पाउनेबित्तिकै चोत्रा फडानीको काम रोकेको उनले बताए । उनका अनुसार सोही वडाका वडाध्यक्षको नेतृत्वमा तीन सदस्यीय छानबिन समिति बनाएर प्रतिवेदन तयार पार्ने र सोही प्रतिवेदनका आधारमा कारबाही अघि बढ्ने तयारी छ । यस विषयमा प्रतिक्रिया लिन खोज्दा समितिका सचिव छत्रराज तिमिल्सैनासँग सम्पर्क हुन सकेन ।
