सिन्धुपाल्चोक — चीनको तातोपानी नाका हुँदै काठमाडौं गइरहेका दुई मालवाहक ट्रकबाट बाह्रबिसे र लामोसाँघुमा गरी २१ लाख रुपैयाँ बराबरको विद्युतीय चुरोट (भेप) तथा केही मोबाइल प्रहरीले बरामद गरेको छ।

इलाका प्रहरी कार्यालय बाह्रबिसे र सशस्त्र प्रहरी बल लामोसाँघुले बुधबार नियमित जाँचका क्रममा सिटमुनी लुकाइएका साना र ठूला आकारका भेपसहित अन्य सामग्री फेला पारेका हुन्।

इलाका प्रहरी कार्यालय बाह्रबिसेका प्रहरी निरीक्षक सुमेश पाण्डेका अनुसार तातोपानी नाकाबाट भन्सार प्रक्रिया पूरा गरी काठमाडौं गइरहेका दुई कन्टेनरमध्ये ना ६ ख ५४९६ नम्बरको कन्टेनरलाई बाह्रबिसेको खुर्सानीबारी बजारमा जाँच गरिएको थियो।

सो क्रममा सिटमुनी लुकाइएका ७४० वटा भेप र तीन वटा मोबाइल फेला परेको पाण्डेले बताए। प्रारम्भिक अनुमानअनुसार बरामद भेप झन्डै २२ लाख २० हजार रुपैयाँ बराबरको रहेको छ। चालकलाई नियन्त्रणमा लिई थप अनुसन्धान अघि बढाइएको प्रहरीले जनाएको छ। जम्मा २५ लाख ५२ हजार बराबरको सामान रहेको तथ्यांक भर्खर प्रहरीले सार्वजनिक गरेको छ ।