बिहान बोलाएर साँझ घर पठाउने गरेको प्रहरीले मंगलबार हिरासतमा राखेको पीडित परिवारको भनाइ
जनकपुरधाम — धनुषामा किशोरी सम्पर्कविहीन भएपछि एक दलित परिवारलाई प्रहरीले नियमित मानसिक यातना दिइरहेको घटना बाहिर आएको छ । महोत्तरी भंगहा नगरपालिकाका जागेश्वर रामलाई धनुषा प्रहरीले हिरासतमा राखेर मानसिक यातना दिएको पीडिको भनाइ छ ।
जागेश्वरका २१ वर्षीय छोरा सन्तोष राम र धनुषा बटेश्वर गाउँपालिका-२ कचहरी टोलकी १७ वर्षीया किशोरी तीन साताअघि सम्पर्क विहीन भएका थिए । उनीहरूले अन्तरजातीय प्रेम विवाह गरेको समाजिक सञ्जालमा भिडियो सार्वजनिक भएको छ । त्यसयता उनीहरु लुकीछिपी बसिरहेका छन् । परिवारको सम्पर्कमा छैनन् । तर, प्रहरीले बोलाएर धाकधम्की दिनुको साथै मंगलबार एक दिन हिरासतमा राखेर यातना दिएको जागेश्वरका भाइ रामबाबुले बताए ।
इलाका प्रहरी कार्यालय महेन्द्रनगरमा केटी पक्षले निवेदन दिएको छ । जसमा १७ वर्ष आठ महिना मात्रै पुगेकी किशीरीलाई ललाइफकाइ भगाएको हुनाले खोजी गरी संलग्नलाई कारबाही गर्न अनुरोध गरिएको छ । त्यसपछि प्रहरीले सुरुमा ५ दिन जागेश्वरलाई बोलाएर छोरालाई झिकाउन, नभए अपहरण मुद्दामा जेल पठाउने धम्की दिँदै आएको थियो । प्रहरीले बिहान बोलाएर साँझ घर पठाउने गरेको राम परिवारको भनाइ छ । तर, मंगलबार साँझ उनलाई घर नपठाएर जिल्ला प्रहरीको हिरासतमा राखिएको जागेश्वरले बताए ।
बुधबार छलफल भएर जागेश्वरलाई दिउँसो ३ बजे हिरासतमुक्त गरिएको थियो । तीन दिनभित्र हाजिर नगराए प्रहरीले सबैमाथि मुद्दा चलाउने भनेर धम्की दिएको जागेश्वरले बताए । ‘तीन दिनमा दुवैलाई हाजिर गराउन भनेको छ,’ उनले भने । बाहिर यो विषयमा नबोल्न प्रहरीले दबाब दिएको उनी बताउँछन् । उनको परिवारले छलफल पछि थप कुनै प्रतिक्रिया दिन मानेका छैनन् ।
इलाका प्रहरी कार्यालय महेन्द्रनगरका प्रहरी वरिष्ठ नायव निरीक्षक श्यामबाबु यादवलाई कुन मुद्दामा जागेश्वरलाई बोलाएर प्रहरीले अनुसन्धान गरिरहेको भनेर सोध्दा उनले जवाफ दिएनन् । तर, ५ दिनअघि बोलाएर सम्पर्कविहीन किशीरी सोधीखोजी गरेको स्वीकार गरे । प्रहरीलाई हरायो भनेर निवेदन आएको र सोही विषयमा सोधीखोजीमा सहयोग गर्न बोलाएको उनको भनाइ छ । ‘५ दिन सोधी खोजीमा सहयोग गर्न अनुरोध गर्यौं,’ उनले भने, ‘हिजो जिल्लामा पठायौं । बाँकी कुरा जिल्लामै सोध्नुन् । महिला सेलले मुद्दा हेरिरहेको छ ।’
महिला सेलकी प्रहरी निरीक्षक निकिता मिश्रले यस विषयमा अनभिज्ञ रहेको भन्दै पन्छिन खोजिन् । किशोरीसँग अन्तरजातीय प्रेम विवाहसम्बन्धी कुनै पनि छलफल नभएको र थप बुझ्नुपरे डिएसपीसँग कुरा गर्न उनले भनिन् ।
डीएसपी बरुणबहादुर सिंहले पनि जानकारी नभएको बताए । ‘त्यस्तो मुद्दा महिला सेलले हेर्छ,’ उनले भने, ‘त्यहाँबाट जानकारी लिनु न ।’
दलित अधिकारीकर्मी विनोद महरा दलितमाथि सधैं प्रताडना हुने गरेको बताउँछन् । ‘जो शक्तिमा छ, प्रहरी त्यसकै कुरा सुन्छ । उसकै कुरा सत्य मान्छ,’ उनले भने, ‘गरिब, दलितको कुरा कानुनसम्मत भए पनि प्रहरीले मान्दैन ।’ दलित भएकै कारण यस्ता धेरै घटनामा प्रहरीले धाकधम्कीका आधारमा दबाउने र छुटाउने गरेको उनले बतए ।
अधिवक्ता रिन्कुकुमारी यादवले राजनीतिक दबाबमा प्रहरी पर्ने गरेको बताइन् । स्थानीय राजनीतिकर्मीको दबाब धेरै हुने गरेको र यस्तो ट्रेन्ड बढ्दै गएको उनको भनाइ छ । विभिन्न प्रकारका धाकधम्कीले दलित असुरक्षित रहेको उनी बताउँछिन् । ‘गैरदलित र दलितबीचको खाडल पुर्न प्रहरी मानवको मर्म र कानुनअनुसार काम गर्नुपर्छ,’ उनले भनिन्, ‘राजनीतिज्ञ पनि सचेत भई सही वकालत गर्नुपर्छ ।’
