मन्त्री यादवले प्रदेश सभापतिमा उम्मेदवारी दिने
जनकपुर — नेपाली कांग्रेस प्रदेश २ संसदीय दलका नेता तथा भौतिक पूर्वाधार विकास मन्त्री रामसरोज यादवले प्रदेश सभापतिमा उम्मेदवारी दिने घोषणा गरेका छन् ।
मधेस भवनस्थित मन्त्री निवासमा नेपाल प्रेस युनियन धनुषाले आयोजना गरेको पत्रकार सम्मेलनमा उनले आउँदो तीनै तहको निर्वाचनमा नेपाली कांग्रेसलाई प्रदेशमा पहिलो पार्टी बनाउने लक्ष्यलिएर नेपाली कांग्रेस प्रदेश २ को सभापतिमा उम्मेदवारी दिन लागेको बताए । ‘आठ जिल्ला भएको प्रदेश २ मधेसको बलियो जनाधार भएको भूगोल हो । संगठनलाई बलियो तथा क्रियाशिल बनाएर तीनै तहको निर्वाचनमा कांग्रेसलाई पहिलो पार्टी बनाउने लक्ष्य लिएर उम्मेदवारी दिँदैछु ।’
५० वर्षीय राजनीतिक जीवनमा पटक पटकगरी झण्डै ६ वर्ष जेल जीवन बिताएका यादव नेपाली कांग्रेस धनुषाको सचिव, १४ वर्षसम्म कांग्रेसको जिल्ला सभापति, जिल्ला विकास समिति धनुषाको सभापति, संविधानसभा सदस्य तथा हाल धनुषा ३ ख बाट निर्वाचित प्रदेश सांसद हुन् ।
‘१४ वर्षीय कांग्रेस सभापतिको कार्यकालमा मैले संगठन विस्तारलाई पहिलो प्राथमिकतामा राखेँ । प्रदेश सभापति हुँदापनि संगठन विस्तार तथा सशक्तिकरण मेरो पहिलो प्राथमिकता रहनेछ, ’ यादवले भने ।
प्रकाशित : मंसिर ६, २०७८ १७:५३