उनले कांग्रेसको पहिचान समाजसँग जोडिएको पार्टीका रूपमा पुनर्स्थापित गर्नुपर्नेमा जोड दिँदै जहाँ समस्या हुन्छ त्यहाँ कांग्रेस देखिनुपर्ने बताए। 'जहाँ समस्या हुन्छ, त्यहाँ कांग्रेस देखिनुपर्छ । विपत्ति आउँछ भने कांग्रेस अगाडि देखिनुपर्छ,' उनले भने, 'हाम्रो राजनीति शक्ति र सत्ताको प्रतिस्पर्धामा मात्रै सीमित हुनुहुँदैन । समाज परिवर्तनका मुद्दामा पनि कांग्रेस अग्रसर हुनुपर्छ ।'

थापाले निर्वाचनलाई मात्र केन्द्रमा राखेर राजनीति गर्न नहुने धारणा राखे । 

'एउटा चुनाव हारियो भन्दैमा आस्थासँग सम्झौता गर्ने कांग्रेस होइन,' उनले भने, 'हाम्रो पहिलो प्राथमिकता नागरिकको भरोसा जित्नु हो । कांग्रेसलाई सत्तासँग होइन, समाजसँग जोड्नुपर्छ । समाजसँग जोडिएको कांग्रेसलाई नागरिकले आफैं सत्तामा पुर्‍याउँछन् । त्यसका लागि पहिला जहाँ गल्ती भएको छ, त्यहीँबाट सुधार सुरु गर्नुपर्छ ।'