काठमाडौँ — एमाले अध्यक्ष केपी शर्मा ओलीले एमाले परिस्थितिसँग आत्तिने र मात्तिने पार्टी नभएको भन्दै अगामी दिनमा नवीकृत हुँदै अघि बढ्ने बताएका छन् । 

शुक्रबार पार्टी केन्द्रीय कार्यालय च्यासलमा आयोजित कार्यक्रममा बोल्दै उनले एमाले अर्कालाई नसमाती उठ्न नसक्ने लहरो नभएको बताए ।

‘हामी यस्तो लहरो होइनौं जसले अर्कालाई नसमातीकन उठ्न सक्दैन । हामी एउटा स्वतन्त्र वृक्ष हौँ । हामी दरो र मजबुत वृक्ष हौं । अरूको बलमा उम्रेका पनि होइनौं । हामी आफैं उम्रिँदै हुर्किंदै मजबुत हुँदै अनेक आँधी, हुरी, तुफान, बाढीसँग सामना गरेर आएका छौं,' उनले भने, 'अर्को कसैलाई नसमातीकन उठ्न नसक्ने खालको त्यान्द्रो लहरो होइन एमाले । एमाले एउटा स्वतन्त्र हैसियत भएको पार्टी हो ।'