काठमाडौँ — प्रतिपक्ष दल नेकपाका सांसद प्रमेशकुमार हमालले संविधानको मर्ममाथि नै प्रश्न उठाउन थालेकाले सरकारद्वारा गठित संविधान संशोधन बहसपत्र तयार पारिएको कार्यदलबाट आफनो पार्टी अलग हुनु परेको स्पष्ट पारेका छन् ।

बिहीबार प्रतिनिधिसभा बैठकमा विशेष समय लिएर बोल्दै उनले संविधानको पूर्ण पालना गर्ने शपथसहित बनेको वर्तमान सरकारले संविधानको आधारमाथि नै हमला गर्ने काम गरिरहेको आरोप लगाए । लोकतन्त्र, गणतन्त्र, संघीयता, धर्मनिरपेक्षता लगायतका आधारभूत कुरामा प्रश्न उठाउने गरी आफ्नो पार्टीले संविधान संशोधनको बहसमा सहभागी हुनै नसक्ने अडानसमेत उनले राखे ।

‘संविधानलाई मान्छौं भनेर प्रतिज्ञा खाएर, शपथ खाएर बहाली भएको सरकार हो । यसका कुनै पनि आधारभूत कुरामाथि प्रश्न उठान पाइँदैन । लोकतन्त्र, गणतन्त्र, संघीयता, धर्मनिरपेक्षता, समतामूलक सहभागिता र त्यसमा हामीले राखेका कैयौं मौलिक अधिकारका विषय त्यति मात्रै होइन, हाम्रो मुलुक, देश, हाम्रो देशको अर्थतन्त्र समाजवाद उन्मुख हुनेछ भनेर संविधानमा लेखिएको छ । हामीले यी विषयमा प्रश्न उठाउने गरी संशोधनको खाका तयार गर्न सक्छौँ ?' उनले भने, 'यसको प्रक्रिया के हो, राष्ट्रिय सहमतिबेगर संविधान संशोधनको प्रक्रिया अघि बढ्न सक्छ ? त्यसैले अहिले संविधान संशोधनसम्बन्धी त्यो डकुमेन्ट लेख्नका लागि तयार गरिएको कार्य दलबाट मेरो पार्टी त्यसमा अलग हुने म सादर अनुरोध गर्छु ।'