काठमाडौँ — परराष्ट्रमन्त्री शिशिर खनालको चीन भ्रमणको तालिका सार्वजनिक भएको छ । परराष्ट्र मन्त्रालयले शुक्रबार प्रेस विज्ञप्ति जारी गर्दै मन्त्री खनालको भ्रमण तालिका सार्वजनिक गरेको हो । 

परराष्ट्र मन्त्रालयका अनुसार मन्त्री खनाल आइतबार ४ दिने औपचारिक भ्रमणका लागि चीन जानेछन् । उनी असार ३ गते फर्कने तालिका रहेको छ । 

चिनियाँ समकक्षी वाङ यीको निमन्त्रणमा मन्त्री खनाल  बेइजिङ प्रस्थान गर्ने भएका हुन् । चिनियाँ विदेशमन्त्री वाङसँग द्विपक्षीय भेटवार्ता हुने पनि मन्त्रालयले जनाएको छ । साथै मन्त्री खनालले बेइजिङमा उच्चस्तरीय भेटघाट गर्नेछन् ।

भ्रमणका क्रममा नेपाली राजदूतावासले गर्ने लगानी सम्मेलनमा समेत उनी सहभागी हुनेछन् । जहाँ चिनियाँ व्यवसायी तथा लगानीकर्ताको पनि उपस्थित रहने विज्ञप्तिमा जनाइएको छ । 

तीनदिने भारत भ्रमण सकेको एक हप्तापछि परराष्ट्रमन्त्री खनाल चीन भ्रमणमा जान लागेका हुन् । खनालको चीन भ्रमणलाई दुई छिमेकी मुलुकसँग सन्तुलित सम्बन्ध कायम राख्ने प्रयासका रूपमा हेरिएको छ ।