काठमाडौं — विपक्षी दलका सांसदहरूको निरन्तर अवरोधका कारण राष्ट्रिय सभाको मंगलवारको बैठक कार्यसूचीमै प्रवेश नगरी स्थगित भएको छ । लगातारको अवरोधका कारण मंगलबारको बैठक पनि कार्यसूचीमा प्रवेश गर्न नसकी स्थगित भएको हो । राष्ट्रिय सभाको अर्को बैठक जेठ २८ गते बिहीवार दिउँसो १:१५ मा बजे बस्ने तय भएको छ ।

राष्ट्रिय सभा अध्यक्ष नारायणप्रसाद दाहालले वर्तमान राजनीतिक परिस्थितिप्रति चिन्ता व्यक्त गर्दै सरकार र राजनीतिक दल दुवैको भुमिकाप्रति असन्तुष्टि जनाएका छन् । अध्यक्ष दाहालले देशको राजनीतिक अवस्था जनताले अनुभूति गर्ने गरी समाधान खोज्न सरकार र दलहरूबीच आवश्यक परामर्श हुन नसकेको टिप्पणी गरे । उनले संसदमा नारा लगाउने, आफ्ना धारणा राख्ने र बैठक स्थगित हुने क्रम दोहोरिनु उपयुक्त नभएको बताए । अध्यक्ष दाहालले सरकारका तर्फबाट पनि समस्याको समाधानमा तदारुकता देखिनुपर्ने र राजनीतिक दलहरूले थप जिम्मेवार तथा सचेत भएर अघि बढ्नुपर्ने आवश्यकता औंल्याएका छन् । 

उनले भने, ‘सिंगो देशको राजनीतिक परिस्थिति अहिले जसरी विकास भएको छ, जनताले अनुभुत हुनेगरी न सरकारको पक्षबाट दलहरूसँग परामर्श न दलहरूले सरकारसँग परामर्श गरेको छ । सदनमा आउने नाराबाजी गर्ने, आफ्ना कुरा राख्ने, सभामुख वा अध्यक्षले बैठक स्थगित भयो भन्ने अनि जाने भोलि फेरि कुन बेला बोलाएको छ, त्यही बेला आउने । यो भएन, सरकारपक्ष माननीयमन्त्रीज्यूको पनि म ध्यानाकर्षण गराउन चाहन्छु । सरकारको पक्षबाट पनि यो विषयमा तदारुकताका साथ नेपाली जनताले अनुभुत गर्नेगरी समस्या हल गर्न हुनुपर्‌यो । यो देश त दलहरूको पनि हो, दलहरुले पनि यसमा अलि सचेत भएर अगाडी बढ्नुपर्‌यो भन्ने मेरो विशेष आग्रह छ । यहाँबाट रुलिङ गर्ने भन्दा पनि यो समस्या सबैको साझा समस्या हो भन्ने कुराको अनुभुत सबैले गर्नुपर्छ । हाम्रा सभाहरू त बन्दक बने बने, सिंगो देश र नेपाली जनता नै वन्धक बजेजस्तो देखिने भयो, यो खालको स्थिति अन्त्य गरौँ ।’