कांग्रेस सचेतक निश्कल राईले भने, 'प्रधानमन्त्रीले संसद्मा आएर आफूले बोलेका अभिव्यक्तिका बारेमा प्रस्टीकरण दिनुपर्छ, जवाफ नदिउन्जेलसम्म संसद्मा अवरोध जारी रहन्छ ।'
What you should know
काठमाडौँ — प्रधानमन्त्री वालेन्द्र शाहले आइतबार संसद्मा दिएको अभिव्यक्तिलाई लिएर आज संसद् अवरोध गर्ने निष्कर्ष विपक्षी दलको बैठकले निकालेको छ ।
कांग्रेस संसदीय दलको कार्यालय सिंहदरबारमा बसेको बैठकमा कांग्रेससहित एमाले, नेकपा र राप्रपाको सहभागिता थियो । श्रम संस्कृति पार्टीलाई बोलाइए पनि बैठकमा पार्टीका तर्फबाट कसैको उपस्थिति रहेन ।
कांग्रेस संसदीय दलका सचेतक निश्कल राईका अनुसार प्रधानमन्त्रीको अभिव्यक्तिलाई विपक्षी दलहरूले गम्भीरतापूर्वक लिँदै भर्त्सना गरेका गरेका छन् ।
प्रधानमन्त्रीले संसद्मा आएर आफूले बोलेका अभिव्यक्तिका बारेमा प्रस्टीकरण दिनुपर्ने र संसद्समक्ष माफी माग्नुपर्ने निष्कर्ष समेत निकालिएको उनले बताए । 'प्रधानमन्त्रीले जवाफ नदिउन्जेलसम्म संसद्मा हाम्रो अवरोध जारी रहन्छ,' उनले भने ।
एमाले उपनेता पद्मा अर्यालले पनि प्रधानमन्त्रीको अभिव्यक्तिले सारा नेपालीको शिर झुकेको भन्दै संसद्मा विपक्षी दलहरूले विरोध जनाउने बताइन् । 'प्रधानमन्त्री संसद्मा आएर माफी नमागेसम्म विरोध जारी रहन्छ,' उनले भनिन् ।
प्रधानमन्त्री शाहले आइतबार प्रतिनिधिसभामा दिएको नेपाल–भारत सीमासम्बन्धी दिएको अभिव्यक्तिलाई लिएर टीकाटिप्पणी भइरहेका छन् । लिम्पियाधुरा, लिपुलेक र कालापानीबारे सांसदहरूले उठाएको प्रश्नको जवाफ दिने क्रममा उनले नेपालले पनि धेरै ठाउँमा भारतीय भूमि मिचेको अभिव्यक्ति दिएका थिए ।
प्रधानमन्त्री शाहको यो अभिव्यक्तिलाई लिएर संसद्भित्र र बाहिर आलोचना तथा विरोध भइरहेको हो ।
‘तपाईंहरूलाई एउटा कुरा अचम्म लाग्छ होला, म पनि अस्ति भर्खर प्रधानमन्त्री भएपछि नै थाहा पाएँ, भारतले नेपालको जग्गा मिचेको मात्र होइन, नेपालले पनि भारतको थुप्रै जग्गा मिचेको रहेछ,’ प्रधानमन्त्री शाहले संसद्मा भनेका थिए ।
