काठमाडौँ — प्रधानमन्त्री वालेन्द्र शाहले नेपाल र भारतबीच सीमा विवादका सम्बन्धमा बोलेका विषय सत्य भए संसद्मा पेस गर्न र नभए संसद्को रेकर्डबाट हटाउन माग गरिएको छ ।

प्रतिनिधिसभाको सोमबारको बैठकमा राप्रपा संसदीय दलका नेता ज्ञानबहादुर शाहीले प्रधानमन्त्रीको अभिव्यक्तिको विषयमा आपत्ति जनाएका हुन् । 'सरकारसँग नेपालले भारतको सीमाना मिचेको कुनै पनि दाबी आधार छ भने संसद्समक्ष पेस गर्न अपिल गर्दछु । छैन भने जनतालाई भ्रमित पार्ने खालका अभिव्यक्तिबाट सरकार जोगिनुपर्छ,' शाहीले माग गरे, 'तथ्यबिना बोलिएका प्रधानमन्त्रीका शब्द संसदको रेकर्डबाट हटाउनका निम्ति म अपिल गर्न चाहन्छु । प्रमाण छ भने पेस गरौं, होइन भने संसद्को रेकर्डबाट हटाउन माग गर्दछु ।' 

प्रजातन्त्रमा अभिव्यक्ति स्वतन्त्रता हुने भए पनि सरकारको नेतृत्वले अभिव्यक्ति दिँदा ख्याल राख्नुपर्ने शाहीको भनाइ थियो । 'सरकारको नेतृत्व गर्ने व्यक्तिको अभिव्यक्ति जिम्मेवार पनि हुनुपर्छ । चिया पसलको गफ र संसदको अभिव्यक्तिबीच फरक हुन्छ,' उनले भने, 'सामान्य नागरिकले भनेको कुरा र देशको प्रधानमन्त्रीले भनेको कुराको प्रवाह फरक हुन्छ । प्रधानमन्त्रीले जब कुनै दाबी गर्नुहुन्छ त्यसलाई देशले सरकारी धारणा ठान्छ । अन्तर्राष्ट्रिय समुदायले आधिकारीक दृष्टिकोणको रूपमा लिन्छ र सत्यका रूपमा ग्रहण गर्छन् ।'