काठमाडौं — कांग्रेसले शुक्रबार संसदीय दलको नेता चयन गर्ने भएको छ । दलको नेता सर्वसम्मत रुपमा चयन गर्न खोजिए पनि सहमति नजुटेपछि निर्वाचनमार्फत चयन गर्न लागिको हो । 

संसदीय दलका लागि अर्जुननरसिंह केसी, भीष्मराज आङ्देम्बे र मोहन आचार्य मुख्य प्रतिस्पर्धी छन् । केसी र आङ्देम्बे दुवै समानुपातिकबाट निर्वाचित सांसद हुन् भने आचार्य प्रत्यक्ष निर्वाचित हुन् । 

प्रत्यक्ष निर्वचितबाटै संसदीय दलको नेता चयन गर्ने पक्षमा सभापति गगन थापा छन् । त्यसो हुँदा थापाले आचार्यलाई अघि सार्ने सम्भावना छ । केसीको उम्मेदवारीले थापा अप्ठ्यारोमा पर्दै आएका थिए । केसी थापाका ससुरा हुन् ।

केसीलाई समानुपातिक सूचीमा राख्दा नै थापाविरुद्ध सामाजिक सञ्जालमा आलोचना भएको थियो । त्यतिबेला उनले सार्वजनिक रुपमै खण्डन गरेका थिए । त्यसैले पनि थापा केसीलाई दलको नेता बनाउन चाहिरहेका थिएनन् । केही दिनअघि उपसभापति पुष्पा भुषालसहितको पदाधिकारी टोलीले निवासमै गएर केसीलाई दलको नेताको अडान छाड्न अनुरोध गरेको थियो । 

केसीले सभापतिको ससुरा भएकै नाताले आफू दलको नेताबाट नहट्ने बताएका थिए । ‘एउटा मापदण्ड बनाएर त्यसमा सहमति खोज्ने हो भने म छाड्न तयार छु । तर, लामो राजनीतिक संघर्ष र योगदानलाई नाता जोडेर अवमूल्यन गर्ने कुरामा सहमत हुनसक्दिन्,’ केसीको भनाइ छ । सभापति थापाले यही कारण पनि प्रत्यक्षबाट दलको नेता बनाउने मापदण्ड बनाएको पार्टीका एक पदाधिकारीले बताए । 

केसीले भने दलको नेतामा सहमति नभए आफू निर्वाचनमा नजाने बताए । ‘प्रत्यक्षलाई गर्ने की, सबैभन्दा युवाहरूलाई गर्ने की, सबैभन्दा सिनियरबाट गर्ने हो एउटा मापदण्ड बनाउ । होइन भने सहमति गरेर ल्याउ, प्रतिस्पर्धा गर्न चाहनेलाई प्रतिस्पर्धा गर्न दिम भन्ने नै मेरो कुरा हो,’ केसीले भने, ‘निर्वाचननै हुने भयो भने म प्रतिस्पर्धामा जान्नँ ।’